335/2025-2026

Lunglei, 2025 Ṭau thla ni 25: Lunglei District-a Ramlaitui khua Ṭhingva zauva hlawhtling taka dawnfawh chin a nih theih dan tur leh dawnfawh hralhna kawnga hma lakpui dan tur zir chiangin vawiin khan Lunglei District Horticulture Officer Pu Lalṭhakima hovin Horticulture staff-te leh NEIDA (North East Initiative Development Agency) team te'n Ramlaituia Pu Isak Lalhuliana dawnfawh hmun an tlawh.

Nikum 2024-a Lunglei District Horticulture Office-in dawnfawh chin dan zirna, "Watermelon Cultivation Training" a buatsaiha a tel aṭangin Ramlaitui khuaa Pu Isak Lalhuliana hian Ṭhingva zau, Ramlaituiah dawnfawh chu a ṭhat theih leh theih loh en chhin nan a ching a. Ṭha taka dawnfawh a thar avangin Ṭhingva zauvah hian dawnfawh a chin hlawhtlin theih tih hriat a ni a. Horticulture Department kal tlanga zau zawka dawnfawh chin a nih theih dan tur leh NEIDA hnuaia Farmers Producers Organisation (FPO) kal tlanga dawnfawh hralhna kawnga hma lakpui a nih theih dan tur zir chiangin DHO leh staff-te leh NEIDA aṭangin Lunglei District Co-ordinator Pu Lalbeiseia leh staff-te chuan Pu Isak Lalhuliana dawnfawh hmun hi a hmunah an enpui a ni.

Horticulture Department hian Pu Isak Lalhuliana hi dawnfawh chi (watermelon seeds) leh a chin dan tura zirtirna leh kaihhruaina (techical guidance) an pe a. Heti anga hlawhtling taka a ching thei hi Horticulture Department chuan an lawmpuiin, lawmawm am tih thu an sawi a. Kuminah hian Ṭhingva zauvah hian chhungkaw tam zawkin a zau (cluster)-a dawnfawh chin an duh thu an sawi chu Lunglei DHO chuan a hlawhtlin theih nan theih tawp chhuahpui an tum thu a sawi a ni.