Higher and Technical Education Minister Pu Lalsawta chuan vawiin khan Pachhunga University College-ah ni hnih chhung awh tur Innovative methods of teaching in Higher Education Workshop a hawng.

Pu Lalsawta chuan ‘lekhathiam’ leh ‘ziak leh chhiar thiam’ tih hi thil inang ni a ngaih theih, a awmzia erawh danglam leh inhlat tak a ni, a ti a. Mizoram hi ziak leh chhiar thiam tamna ram ni mahse chhawr tlak leh hman tlak tak tak tura lehkhathiam ziktluak erawh an tam lo tiin hemi kawngah hian hmasawn a tul hle a ni, a ti. Mithiam leh zirna lama sulhnu nei tha te zirtirna ngaithla tur te, College zirlai ten hma an sawn theihna tura zirtir dan tha zawk ngaihtuah ho tura Mizoram hmun hrang hrang atanga College zirtirtu kalkhawm ten he workshop atang hian hmasawnna duhawm tak an chhar chhuah ngei a beisei thu Higher and Technical Education Minister Pu Lalsawta chuan a sawi a ni.

Workshop hawnna inkhawm Prof JV Hluna kaihhruaiah hian Pachhunga University College Vice Principal Dr C Lalrawna pawhin thu sawiin Mizo zirlaite High School leh Higher Secondary School atanga mark tha tak hmua passed chhuak ten College an dai chinah an mark hmuh lo tlahniam thin ni a lang chu ngaimawh tham a tling, a ti a, College zirtirtu te tan lak lehzual tula a hriat thu a sawi.

Innovative methods of teaching in Higher Education Workshop hi Internal Quality Assuarance Cell, Pachhunga University College buatsaih niin Aizawl khawpui chhung leh Mizoram hmun hrang hranga College zirtirtu ten an tel a. Vawiinah hian IQAC Director Prof Margaret Ch Zama, IASE Principal Dr Vanlalhruaii leh MZU Associate Professor Dr Lalbiakdiki ten te paper buatsaih zirho a ni ang.