Vawiin khan Education Minister Pu Lalsawta chuan Mizoram Govt. Adhoc Aided High School Teachers’ Association (MIGAHTA) Special General Conference, Chanmari YMA Hall-a neih a hmanpui.

Pu Lalsawta chuan nakin lawka ram hruaitu leh sorkar leh khawtlanga mawhphurhna pawimawh chelhtu tur chherchhuak tu an nih avangin nakina kan ram dinhmun tur hi zirtirtute kovah thui tak a innghat a ni, a ti. Zirna in hma a sawn theih nan thahnemngai takin sorkar chuan tan a la a, a hlawhtlinna tak tak chu zirtirtu te leh zirlai te ah a innghat tih sawiin hman tlak leh chhawr zirlai chher chhuak ngei turin a chah a. Lehkhathiam hna hmulo tipungtu ni lova, hmantlak mithiam tam tak an lo chhuah theih nan an zirtir danah pawh kum tam tak chhung an lo kal pui tawh thin, tihdan phung pangngai a neih leh ngaia neih mai lova, ngaituahna thar leh thlir dan thar nei turin zirtirtu kalkhawm te a chah a ni. Education Minister chuan sorkarin Education Reforms Commisssion rawtna te tihpuitlin tuma hma a lak mek thu sawiin vawi leh khatah engkim tih hlawhtlin nghal theih ni lo mahse bawhzui mek zel a ni a, Mizoram Education Service rules pawh duan mek a nih thu a tarlang bawk.

He huna thusawitu dang Education Director Pu P Lalchhuanga pawhin zirtirtu te chu an pawimawhzia hria a, taihmak chhuah sauh sauh turin a fuih a. Sorkar department dang zawng zawnga thawktu te bakah an thawh chhuah chhawr tangkai tu te thleng hian zirtute ke bula seilian vek an ni a, chuvangin ram tana mi hmantlak leh puitling chherchhuah hi zirtirtute kovah a innghat a ni, a ti.

Mizoramah hian tun dinhmunah Govt. Adhoc Aided High School 129 awmin zirtirtu 874 an awm a, zirlai 8474 an awm a ni. Vawiin Mizoram Govt. Adhoc Aided High School Teachers’ Association (MIGAHTA) Special Assembly-ah hian an President Pu F Lalkhawchhana’n rorel inkhawm a kaihruai a, chawhnu session hi an Vice President Pu Lalzirliana’n a kaihruai a ni.