Vawiin chawhma khan Aizawl Civil Hospital-ah Association of Minimal Access Surgeons of India (AMASI) leh Association of Surgeons of Mizoram (ASM) tangkawp buatsaih ‘Workshop on Advanced Laparoscopic Gastrointestinal Surgery’ neih a ni.

Civil Hospital Medical Superintendent Dr. K.L. Remsanga chuan kalkhawmte lawmna thu sawiin India ram hmun hrang hrang atanga lo kalte thiamna chu mizo ten kan tangkaipui tur thu a sawi a. Workshop hlawhtling tak neih ngei a beisei thu a sawi a. ‘Laparoscopic Management of CBD Stones’ tih thupui hmangin Dr. Manoj Kumar Chaudhury chuan presentation a pe a. ‘Carcinoma Stomach and Management’ tih thupui hmangin Dr. Rakesh Shivhare, Indore atanga lo kal chuan presentation a pe bawk a. Chawhnu lamah Live Surgery Workshop neih chhunzawm a ni ang.

Nizan khan Conference-Hall, Hotel Floria-ah Workshop hawnna programme neih a lo ni tawh a. Workshop Organizing Chairman Dr. Saia Chenkual chuan kalkhawmte lawmna thu a sawi a. Association of Surgeons of India (ASI) President Pu Dilip Gode chu Khuallian niin presentation doctor thiam tak takin an nei a. Workshop hi ni hnih ( March Ni 2-3, 2018) awh tur niin seminar (CME- Continuing Medical Education) leh Live Surgery pholan a ni dawn a. Aizawl Civil Hospital Operation Theatre-ah leh Seminar Room-ah te neih a ni ang. India ram hmun hrang hranga Laparoscopic surgeon thiam tak takin Mizorama Laparoscopic Surgery (zai lova verh) chi hrang hrang kalpui mek bakah tihdan thar kan surgeon-te an zirtir dawn a. President ASI Dr. Dilip Gode, President AMASI, Dr. Tamonas Choudhuri, AMASI Senior Vice President Dr. Manoj Kumar Chaudhury, AMASI Secretary Dr. Jugindra S leh surgeon dangte workshop-ah hian an tel a. Hetiang anga India ram pum huap (national workshop) hi Mizoram-ah a thleng zen zen lo a ni.