Mizote kut zinga ropui leh hriathlawh ber Chapchar Kut chu vawiin khan Joint YMA, Pangzawl  buatsaihin Pangzawl Public Playground -ah ropui taka hman a ni a, Pu PC Lalthanliana, Minister Social Welfare etc chuan KUT PA niin a hmanpui. 

Kut PA Pu PC Lalthanliana chuan Chapchar Kut hmang tura kalkhawm zawng zawng te duhsakna chibai bukin Kut ropui taka hman anih theih nana Pangzawl mipuite phur taka anlo inpuahchah avangin an chungah lawmthu a sawi a. Khawvel a hnam changkang ten an hnam thil hlu leh an hnam nun zia theihnghilh mai lovin an ngaisangin an hlut tawlh tawlh thin a ni tiin Mizote pawhin changkang leh hmasawn lam panin kan kut neih te kan hlutin kan ngaisang thiam hi a lawmawm takzet a ni, a ti a. Pangzawl mipuite chu mizo nun ze Mawi chhawm nung zel tur leh kan hnam zia rang leh nih phungte chawinung zel turin Kut Pa chuan a chah a. Kut buatsaihtu Joint YMA Pangzawl te inpekna leh thawhrimna chu fakawm a tih thu sawiin Minister chuan Chapchar Kut hlim leh nuam taka an hman theih nan kalkhawmte duhsakna a hlan a ni.

He huna thu sawitu dang Pu Fabian Lalfakawma Finance Secretary,  Central YMA chuan Mizoram sawrkar Chapchar Kut Organizing Committee in Mizoram hmun hrang hranga Chapchar Kut lawmna atan sum thahnem tak a ruahman avangin CYMA aiawhin an chungah lawmthu a sawi a. Kut Pa Pu PC Lalthanliana chungah pawh lawmthu sawiin a hmalakna leh remhriatna zara Pangzawl mipuiten Chapchar Kut ropui taka an hmang thei chu a lawmawm takzet a ni, a ti.  Kumin Kut thupui "Sem sem dam dam, ei bil thi thi" tih chu thinlunga vawnga midangte tana malsawmna nih tum theuh turin Kut chhimtute a chah bawk. 

Chapchar Kut lawmna program hi mipui in an hlut hle a, Pangzawl leh khaw thenawm atangin mipui thahnem tak an kalkhawm a.  Kut pual hian Pangzawl khaw chhunga YMA branch paruk hnuaia YMA chhungten a huhova Cheraw lam (mass Cheraw dance) an entire a, hnam thuam phona show costume parade te neih a nih bakah Chapchar Kut lo chhuah Dan thusawina te, saiip in tlansiak, Vaiza kunga in lawn sink leh Chhawnghnawh te nei in hun hlimawm tak an hmang a ni.