Vawiin Tahrik Ni 2, Vau thla khan Champhai Kahrawt Field-ah Sub-Hqrs. YMA Champhai kaihhruainain Chapchar Kut ropui taka lawm a ni a,  Champhai DC charge la mektu Pi Lalsangpuii Hmar, Addl DC chu Kut Thlengtu niin,  Pu H.Lianruma, YMA hruaitu hlun chu Kut Pa a ni.

Chapchar Kut thlengtu, Pi Lalsangpuii Hmar chuan Kut hmang tura kalkhawmte  lawmna thu sawiin chibai a buk a. Chapchar Kut chu pipute hun ata tawh awmni khama hman thin, ram pum huapzo Kut a ni, a ti a. Hmasawnna leh changkanna pawhin a chim bo zawh loh, vawiin thlenga chhawm nuna awm Chapchar Kut Mizoten kan nei chu a nihlawhthlak thu a sawi a. Sawrkar pawhin ngaipawimawhin Zirna In leh Pisa chawlh puangin, District tinah a lawmna senso tur sum pawh a pe thin a ni, a ti a. Hnam ropui apiangin hnam culture-te an humhalh thin thu sawiin, hnam tlem zawk Mizote phei chuan kan culture vawnhim hi kan tihmakmawh a ni, a ti a. Hnam ziarang chu pawnlam leh chhunglamah thliar hran niin pawnlam chuan hnam thuam, lam leh rimawite a huam a; chhung lam chuan zonun ze mawi tak; Aia upa zah, Tlawmngaihna, Rinawmna, Thianghlimna, Taimakna, Huaisenna leh a dangte a fawm tel vek thu a sawi a. Tlawmngaihna chu tawngka maiin a phuhchhuak zo lova, hnam dangte laka kan uanpui, kan society min hrutrualtu leh mizo nih tinuamtu ber pakhat a ni, a ti a. Kalkhawmte chu an thinlung theuhah hnam ze mawi chawinung tharin inhlanna thar nei turin a chah a. Kut lawm dan thianghlim tak buaina leh innghirnghona awm lo, inunauna leh tanrualna Kut siam tum theuh tura sawmin hnam damna leh dinchhuahna lam chawinun tlat a tul thu a sawi a. Chapchar Kut thupui thlan ‘Sem sem dan dam’ tih chu rilru a vawnga, a taka nunpui angaih thu leh thian chhan thih ngam tura inhlan thar leh a pawimawh thu  a sawi a. Chapchar Kut hmang tura kalkhawmte chu Kut nuam leh hlawkthlak tak hmang theuh turin duhsakna a hlan a ni.

Kut Pa Pu H.Lianruma chuan Kut hun lawmawm tak buatsaih anih theihna tura Chapchar Kut Celebration Committee-te leh Kut thlengtu DC-te chu fakawm a tih thu a sawi a. Kut thupui thlan ‘Sem Sem dam dam’ lo chhuah dan leh pipu ten an lo nunpui thin dan te sawiin, kalkhawmte chu mahni tanghma chauh hai lova, Mizo taka midangte tana malsawmna nih tum thin turin a chah a. Mizo thuam mawi tak, kan hnam ziarang pholangtu chu naupang atanga puitling chenin tun aia uar leh zuala  inbel a tul thu leh naupangte rilruah Kut hrisel awmzia tuh angaih thu a sawi a. Pipute chuan Kut lo thleng tur chu uar leh nasa takin an er lawk thin thu a sawi a. Kut sa, buh leh balah intodelh an tum tlat thin a, rethei leh chhumchhiate tan ui hauh loin sem sem dam dam an lo ti thin a ni, a ti a. Hmasang atanga Chapchar Kut-in  a ken tel ‘Sem sem dam dam’ tih chu thangthar ten cheinung zel se a duh thu  leh neinung zawk ten neilo zawkte phal takin pui thin se, Kut chuan rah duhawm tak a chhuah a beisei tlat thu a sawi a.  Mizo nun ze mawi leh entawntlak tak mai kan pipute lo nunpui thin kha thangtharte hian chhawmnung zel se a ti a. Kut chhimtute chu buaina leh innghirnghona te dah bo a, hlim leh lawm takin zai leh lam chung zela Kut nuam tak hmang turin duhsakna a hlan a ni.

Vawiin Chapchar Kut-ah hian Sub-Hqrts. YMA Champhai thuthmun huamchhunga Branch YMA hrang hrang atangte, Zomi Cultural Society (ZCS), MHIP leh MUP  lam atang ten  malzai, zaipawl, rimawi tum leh hnam lam benglut tak takte ngaihtlaka thlirho a ni a.  Mizo hnamlam pholan zingah Arsi lam, Dar lam, Buhtuh lam,  Par lam, Chheih lam, Chawnglaizawn, Sarlamkai,  Cheraw (Buhza-aih Cheraw, Kantluang Cheraw, Zonunpar Cheraw leh Zialung Cheraw) te entir  anih bakah Chai a Kut hun kharna hman a ni.

Kut lawm tura lokal Naupang kum 6 hnuailam Mizo hnam incheia inchei nalh mipa leh hmeichhe naupang thlan chhuahte hnenah Kutpa in lawmman a sem a. Chapchar Kut Miss 2018 hnenah lawmman hlanna neih a ni bawk.