Vawiin hian Serchhip Leisekawt Mualah Chapchar Kut, 2018 hlim taka hman a ni a, Pu R. Sanghmingthanga, President, Sub-Headquarters YMA chu Kut thlengtu niin Pi Sangchhin Chinzah, Serchhip Bawrhsap chu Kut Nu a ni.

Hun khatna, Pu Kawlthuama, Kut Organising Chairman kaihhruaiah Kut thlengtu Pu R. Sanghmingthanga chuan, kan pi leh pute chuan an kut ropui ber Chapchar Kut an hman dawn chuan, chhungkua leh khawtlang an hlim lovang tih an hlauva, inhau an duh lova, nupa pawh an inkhak ngai lova a ni. Hlimna thawm in khawtlang an tithangkhawk a, lamin mual an awi kur thin. Vawiina Serchhip a Chapchar Kut hmang tura lokal zawng zawngte hlimna hian Leisekawt Mual hi tikur rawh se, tiin kut hmang tura kal khawmte a lawm a.

Kut Nu, Pi Sangchhin Chinzah pawhin, kan hnamzia, kan rohlu hi kan tu leh fate tana chhawm nunga, an thinlunga tuhngheh a tul a. Zo ze mawi chi hrang hrang leh khawtlang inpawh tlanna tha pawimawhnate chhem alha tinung reng turin Chapchar Kut hi a pawimawh a. Vawiin hi tangkai tak leh hlim takin mipuiten i hmang ila, kan fanau kan YMA Chhangte hian hmun pawimawh luah tlat rawh se, tiin Kut chhimtute a chah bawk.

Hun khatnaah hian Serchhip Branch hrang hranga YMA Chhangten Tlang Lam an entire, MUP ten Bawhhla nena Tlangtlirin Marian H/S naupangten Darbu an tum a, Sub-Hqtrs YMA Zaipawl ten hla an rem bawk.

Hun hnihnaah Mizoram huap zaithiam heng Lalhungchhungi Pachuau, Zoramchhani leh midante an zai bakah Sarlamkai, Khuallam, Cheraw, Kalchhet kal te Branch hrang hrangten an entir bakah Chhawnghnawt pui buatsaih a ni.

Hun thumnaah hian Mizoram huap zaithiam heng, Zoramchhani, Lalhungchhungi Pachuau, Zosangliani, Sailothangi Sailo leh Er. F. Lalsanglura ten mipuite an awia. Mipuiten an hlut hle a ni. Serchhip Chapchar Kut Miss, 2018 result puanna neih a ni bawk a, Chapchar Kut Miss ah hian Nl. Malsawmsangi, Pu Lalnithanga fanu, Serchhip Dinthar Branch YMA member chu thlan a ni. Hun thumna hi music concert anga kalpui niin mipuiten an hlutin an hlimpui hle a ni.

Chapchar Kut 2018 ah hian MHIP Serchhip Sub-Headquarters ten hmanlai hmeichhiate la deh dan tihlanna, Mual sirah an nei reng a, MUP  ten hmanlai thiamhnang deh dan chi hrang hrang entirna an nei reng bawk a. Hengte hi kut chhimtu mipuiten an hlut hle a ni. Tin, Hmar Veng YMA Branch te chuan a duh apiangte in theih turin Thingpui sen hang leh Kurtai Mual sirah an sem reng  bawk.