Vawiin khan Aizawl District Disaster Management Authority huaihawtin Local Council leh YMA Branch hrang hrang te tan chhiatrupna chi hrang hrang thlen palh thut a invenna leh chetlak dan zirhona Workshop chu I&PR Auditorium-ah neih a ni a. Aizawl District Deputy Commissioner Pu Franklin Laltinkhuma’n a hmanpui a ni.

Aizawl DC chuan District Management Act, 2005 in a sawi angin Mizoram sawrkar pawhin District tinah DDMA dinna tur thuchhuah May 23, 2006 khan a siam a, DDMA hian District huam chhunga chiatna thleng mai thei venna te, tawrhna tihnep dan tur te leh a lo thlen a chhawmdawlna pek dan turte a duangin hma a la mek a ni, a ti. Pu Laltinkhuma chuan Mizoram bikah phei chuan hetiang rikrum nikhua a che vat thin tlawmngai pawl inpe tak tak an awm hi a vanneihthlak hle a ni, tiin thawhpui zui zel tur pawhin a sawm nghal a ni.

Vawiin Workshop-ah hian chhiatrupna hrang hrang thlen thulha inruahman dan felfai zawk chungchang te, kangmei leh rikrum thila chhawmdawlna ngaihtuah dan chungchang te chu Aizawl Addl SP (Crime), Fire Department leh DC lam hotuten an sawi a. Central YMA aiawhin Finance Secretary Pu J. Lalsailova’n YMA thathawh dan leh an inbuatsaih dan hrang hrang kalkhawm te a hrilhfiah bawk.

Chhiatna lo thlen thutah District Administration lamin chak zawka hma a lak theih nan Aizawl District hi zone 12-ah then a ni a. Zone tin atan Zonal Officer ruat an ni a, heng Zonal Officer te hi khawi vengah pawh chhiatna engpawh lo thleng sela biakpawh theih reng an ni. DC Office Complex-ah Emergency Operation Centre a awm a, he Centre-ah hian hmanraw chi hrang hrang chhiatna lo thlen a hman tangkai theih tur a awm a, DC Office a thuneitute hrilh hriain a hman theih reng bawk. Chhiatna tawk palh te chuan anmahni bialtu Zonal Officer theuh te hriattir theih reng an ni.