Vawiin chawhma dar 11 khan I&PR Conference Hall, CHANEM Building ah Power & Electricity Department leh Joint Electricity Regulatory Commission (JERC) for Manipur and Mizoram tangkawpin an buatsaih, Workshop on Electricity Consumers Awareness neih a ni.

He workshop hi Champhai District-a a vawikhatna niin, Mizoram chhungah a vawihnihna a ni. He workshop hi chawhma leh chawhnu huna then a ni a, chawhma lam hi hawnna hunah hman niin Pu A. Chhawnmawia, Secretary, JERC (M&m) chuan a kaihruai a, Pu C. Hmingthanzuala, IAS (Rtd.), Chairperson, JERC (M&M) chuan thu sawiin Electricity Regulatory Commission hi Electricity Act, 2003 Section 82 in a sawi angin India ram state zawng zawngin a neih tur a ni a, Mizoram leh Manipur state tan pawh kum 2005 khan Joint Electricity Regulatory Commission hi din a ni, a ti a, he commission hi power sector reform siamthatna atana ruahmanna a ni a, stakeholder zingah consumer te a dah pawimawh ber a ni, a ti. Mipuiten electric kan pawh ruk hian Power & Electricity Department ta kan ruksak ni lovin mipui ta kan ru a ni zawk a. Electric connection kan lak a, kan electric hman tur bituk zat aia tam kan hman hian a tuartu chu mipui tho kan ni a, hemi kawngah hian kan thanharh a tul hle a ni, a ti a, electrict hnianghnar zawka kan neih theih nan a man pek that a tul thu a sawi tel bawk.

Er. F. Rualzakhuma, SE (CPC) pawhin India ram chhunga power semdarh dan leh a enkawl dan te chipchiar takin a tarlang a, India rama electricity siam chhuahna zawng zawng hi thlun zawm vek a nih dan te leh power siam chhuahna kawnga central sorkar leh state sorkar hmalak dan te a sawi a ni. Hawnna inkhawmah hian Dr. Aichhunga, President, Mizoram Consumers Union, Champhai Branch pawhin thu a sawi bawk.

Chawhnu lam hi Interactive Session niin JERC lam atangin Pu Shyamsundar Singh, Chief (Engineering) in presentation a pe a, P & E Department atangin Champhaia power lakluh dan tlangpui te, consumr awareness chungchang leh Internal Grievances Cell chungchanga hriattur pawimawh zual te Er. Lalthanzuala, SDO hnen atangin ngaihthlak a ni. Hemi hnu hian kalkhawmt hian sawihona an nei nghal a ni.

Vawiin workshop nei tur hian JERC lam atangin Pu C. Hmingthanzuala, IAS (Rtd), Chairperson hovin Er. H. Bihari Singh, Membr, Pu A. Chhawnmawia, Sercretary, Er. N. Shyamsudar Singh, Cheif (Engineering) leh Pu Richard Zothankima, Assistant Secretary te an kal a, P&E Department aiawhin Er. F. Rualzakhuma, SE Champhai Power Circle, Er. H. Zonunsanga, Khawzawl Power Division, Er. Lalnithanga, EE Power Projct Division Champhai leh Champhai Powr Circle hnuaia SDO te leh JE te an tel. Consumer lam atangin Champhai NGO hrang hrang aiawh sawm bik te, sawrkar department hrang hrang hotu sawm bik te leh khawtlang mi pawimawh sawm bikte an tel tha hle a. Workshop hi a tel te hian an hlawkpui hle a ni.