NABARD, Mizoram Regional Office, Aizawl bultumin ni 2 awh tur Self-Help Group te tan hriattur pawimawh hrang hrang inhrilhhriatna Workshop chu vawiin NABARD Conference Hall, Bawngkawn, Aizawl ah neih tan a ni.

Workshop chhimtute lawmna thu sawiin NABARD General Manager/OIC Dr. P.M.Ghole chuan NABARD hian SHG te chawikan nan namen lovin hna a thawk tawh a, SHG leh Bank inkara an thawh palaina hian khaw kilkhawr zawk leh mi harsa zawkte tan sum khawlna te, ei leh bar an zawnna kawngah leh sum puk chungchangah a pui thin a ni, a ti. Hemi avang hian kumin June thla thleng khan SHG 3479 laiin Bank nen thawhhona an nei mek a, hamthatna tur hmabak thahnem tak erawh a la awm cheu a ni, a ti bawk.

He Workshop hi Bankers’ Institute of Rural Development (BIRD), Lucknow huaihawt a ni a, Workshop hmanpui tur hian mithiam pahnih Prabhakar Behera leh Deepak Manchandra te an lo kal a ni. State Bank of India, Mizoram Rural Bank, Mizoram Cooperative Apex Bank Ltd, Zoram Entu Pawl, Ferrando Women Developmen Centre (FIWDC), Centre for Peace & Development (CPD), Cod Nerc, Mizoram Mahila Sangathan, RADP (Serchhip District) leh ASHA (champhai District) aiawhte an tel a ni.