Office of the District Magistrate, Aizawl District, Aizawl (Judicial Branch) chuan 10th October 2011 khan Thupek chhuahin mi tumahin Hrangbana Petrol Pump leh Phunchawng inkar NH 54 (Sairang Road) ah leivung an paih tur a ni lo tih mipui an hriattir a ni.
Mi thenkhatin Hrangbana Petrol Pump leh Phunchawng inkar Sairang Road-ah leivung an paih thin tih hriat a ni a. Hei hian a chhehvela chengte tan harsatna a siam a, an tui tlan lai te a tibawlhhlawhin boruak rimchhia leh bengchheng a siam mai bakah NH 54 pawh a tichhe mek tih hriat a ni a. Henglai hmun hi a bul vela chengte tan a lo hrisel zawk theih nan leh kawngpui NH54 a lo him zawk nan Sec.144 Cr.P.C.1973 (Act II 0f 1974) tlawhchhanin thupek hi chhuah a ni.
He thupek hi sut leh a nih loh chuan a chhuah ni atanga thla hnih chhung a huam ang. He thupek awih lova paih lui an awm chuan dan dinglai angin an chungah hremna lek a ni ang.
