Chief Engineer, Zone-II, PHED bultumin vawiin chawhma atang khan Lunglei I&PR Conference Hall-ah ni hnih awh tur ‘Workshop on Sustainable Development Goals’ buatsaih a ni a, Er. C. Lalremsiama, C.E., Zone-II, PHED chuan a hmanpui.

Er. C. Lalremsiama chuan United Nations-in Sustainable Development Goals (SDG)-a a ruahman angin, kum 2030-ah chuan mitin in tui hnianghnar taka an dawn a ngai tawh dawn a, chumi ti hlawhtling tur chuan eng dinhmuna ding nge kan ni tih leh engtia hma lak ho tur nge kan sawiho a tul a ti a. Kalkhawm te chu workshop tangkai taka hmang turin a chah a ni. Sekhum leh Tonkolong ah te hlawhtling taka solar pump hmanga tui pump a nih thu sawiin, India ramah ngei pawh hetiang stage tam leh project lian nei ve an awmloh a rin thu a sawi a ni.

Workshop hi Er. H. Duhkima, SE, Lunglei WATSAN Circle chuan kaihruaiin, Lunglei WATSAN Circle hnuaiah khua 380 (rural) leh khua 5 (urban) an chawm mek thu a sawi a. Tun dinhmunah Lungleiah mi pakhat zelin nitin tui litre 32 (32 litre per capita per day) dawng ang a nih laiin, SDG chuan khawpuia cheng te tan litre 70-a tihsan a ngai a ti a, tui mamawhna a san zel avangin, tuihna kan humhalh leh tuihnar kan venhim a tul a ni, a ti. Chief Engineer hmalakna in consultant ruaia Lunglei khawpui tan ek thli leh tui chhia sawngbawlna tur project siam mek chu peih fel tep a nih thu a sawi bawk a ni.

He Workshop hi Lunglei WATSAN Circle hnuaia Junior Engineer (J.E.) leh a chunglam te tana buatsaih niin, Division hrang hrang ten presentation an nei a. Er. J. Kapkima, EE, RWD chuan lawmthu sawina in hawnna inkhawm hi a khar a ni.