Vawiin chawhma Dar 10:00Am khan DC’s Conference Room Siaha-ah District Development Co-ordination & Monitoring Committee (DDCMC/DISHA) vawikhatna neih a ni. He DDCMC/DISHA hi tun hmaa District Vigilance & Monitoring Committee (DV&MC) thin kha niin, Committee Member te tipun belhin Vigilance leh Monitoring chauh ni tawh lovin, Committee hian Co-ordination lamah pawh rilru senga hmalakna kalpui tur a nih tak avangin, Committee hming pawh District Development Co-ordination & Monitoring Committee (DDCMC/DISHA) tih a thlak a lo nita a ni.

Vawiin Meeting hi DDCMC Chairman Pu CL.Ruala, MP (Lok Sabha), Co- Chairman Pu Ronald Sapa Tlau, MP (Rajya Sabha) ten an kaihruai a. CSS (Centrally Sponsored Scheme) khawih Department hrang hrang ten 2016-2017 , 2nd Quarter (July-September) chhunga an hnathawh leh hmalakna hrang hrang te Report pein, an hmachhawp hrang hrang te pawh thlir hova huang zau taka sawi ho a ni. 2016-2017, 1st Quarter( April- June) atanga hmasawnna an neih ang ang leh harsatna an neih te Meeting-ah hian an thlen an ni.

Pu CL Ruala chuan CSS sum hmang hian Line Department te hian chhenfakawm hmasawnna leh ramro tling thil kan sualchhuak em?, tih hi Head of Office te chuan kan inzawh fo a ngai a. Siaha District mipui te pawhin Line Department te hmalakna kawng tinrengah tawiawma, finchhuaha, CSS sum hi a loh thlawna a luanral mai lo nan rinawm tak leh taima taka kan thawhho a ngai a ni, a ti.

Pu Ronald Sapa pawhin CSS hnuaiah Line Department te thawhho a tul fo va, Head of Office te chu inlungrual tak leh mipui te hamthatna tur leh ram hmasawnna tur rilru-a dah pawimawh ber chunga hna thawk theuh turin a chah hlawm a. DDCMC Member-a khawtlang aiawh hmeichhia an tel nual avangin lawmawm a tih thu a sawi bawk a ni.

April-September,2016-2017 chhunga CSS Line Deparment te hmalakna Report langsar zual te chu:-

1) DRDA Report-ah chuan MGNREGS hnuaia cheng nuai Rs.183.884/- dawn a ni a. Siaha District chhungah Job Card Holders 13757 awmin, ni 6 inhlawhna pek chhuah tawh a ni a. Pawisa hman ban (unspent Balance) cheng nuai Rs.1.384/- a awm mek. IWMP-I,II,III,IV,V,VI leh VII hnuaia a vaia Fund dawn tawh chu cheng nuai Rs.144.59/- a ni a, cheng nuai Rs.78/- PIA ah Release tawh niin, Balance cheng nuai Rs.66.59/- a la awm.

2) Medical Department Report-ah chuan Nau chunga Nu thi zat (No. of Maternal Death)-2, Naupang kum 1 hnuailam thi zat-23, kum 1-5 inkar naupang thi zat-1, Infant Mortality Rate-49%, Naupang damlo Sick New-born Care Unit (SNCU) a Admit 88 atangin, 80 damin an chhuak a, 8 an thi. % of Live Birth-99%, % of Still Birth-1%, % of Pregnant Women Registered for ANC-98%. Sub.Centre hmeichhe Health Worker awm lohna-9 a awm.

3) PMGSY hnuaiah Kawngpui 8, a thui zawng belhkhawm 132.79 Km sial mek a ni thu leh No-aotlah to Chakhei inkar kawngsiam hna Contract erawh Terminate a, Re-Tender leh tur thu PWD lam chuan Report an pe bawk.

4) PHE Department chuan Tokalo WSS (Solar Pumping) chu zo tawhin, Tokalo khua-ah April ni 28 khan tui an Pump chhuak thei tawh a. Siaha GWSS erawh zawh hun tur bituk; Last Quarter 2015-2016-ah an zawh theih loh thu an tarlang.

5) SSA Report-ah chuan Primary Teachers, UPS Teachers, Arts Instructors leh Health Instructor te hlawh tur PAB Approved tawh atangin, 17% chauh an la dawng.

6) Tipa RD Block in BADP hnuaiah cheng nuai Rs.181/- Central atangin an dawng a. Hna hrang hrang 17 thawh nan a hman niin, Hna 5 erawh la zawh loh niin la thawh chhunzawm mek zel a ni.

7) ICDS hnuaiah Scheme thar Vanbandhu Kalyan Yogana (VKY) kalpui mek a ni a. Rapid Reporting System (Online Reporting) pawh kumin September atanga kalpui tan tawh a ni.

8) DHO Office hmalakna hnuaiah Tisopi khua-a Turmeric Grower Association te chuan tun atanga hun reilote-ah 100gm a Pack in, Packaging Label nalh leh mawi tak nen an hralhchhuak thei tawh dawn a ni.