1980/2022-2023
Aizawl the 19th September, 2022 : Vawiin khan Horticulture Deparment buatsaihin World Bamboo Day pualin RB McCabe Hall, Aijal Club-ah hman a ni a, he hunah hian Bamboo Development Board Vice Chairman Dr.K.Pachhunga chu khuallian a ni.

He hunah hian Chief Minister Pu Zoramthanga chu N.Delhi-ah sawrkar laipui dawra a awm avangin vawiin hian a tel ramchangloa, amaherawhchu he ni pual a 'speech video message' ngaihthlak a ni a, Mizoram leilung hausakna mau leh rua te chu hlut a, eizawnna nghelnget min pe thei tih hriain, vawiin a World Bamboo Day puala kalkhawm zawng zawngte duhsakna a hlan a ni.

Dr. K.Pachhunga chuan thu sawiin Mizoram chu mau tamna hmun leh duahna hmun a ni a, a hlutna chang hria ram hruaitu kan nei hi kan vannei hle a ni a ti a. Kan ram chu mau hmangin malsawmna kan chang a, ram leilung hausakna tam tak kan neih zingah mau hi kan hlut thiam a, khawvel mihring tam takin mau hmangin eizawnna an nei tih hria ila, mau hmanga eizawnna khawvela nei zaa 70 te hi China ram mite an ni a, India pawhin Bamboo Mission neiin, mau atanga eizawnna siam leh mau hman tangkaina hrang hrang ngaihtuah leh hmalak chu a tum ber pakhat a ni a ti a. Mizoram pawhin State Bamboo Mission, Mizoram kan nei a, hemi hnuaiah hian thlur hnihin hmalakna kan kalpui mek a, Bamboo Development Agency kaltlangin mau awmsa hman tangkaina tam tak haichhuah a ni a, a dang leh chu mau/rua chi tha hmang a hmun zauh belh leh chin pun nana hmalak hi a ni a ti a. Heng bakah hian bamboo shoot processing ah pawh hma nasa tak a lak a ni a ti a. Mau hian chemical property hrang hrang neiin, chung zingah chuan cellulose zaah 60 a pai a ni a ti a, heng cellulose te hi Petroleum tihpunna (blender) ethanol pe chhuak thei an ni tih hria ila, vawiin ni ah hian mau te hi kan ram ngaw siamtu, eizawnna min petu, boruak thianghlim leh leilung luangral tur dangtu piah lamah khawvelin energy source tha a ni tih a hre tulh tulh ang hian, keini zoram mipuite hian mau hi I hlut thar leh ang u tiin kalkhawm te a chah a ni.

He hunah hian MLA Pu H.Lalzirliana leh midangte an tel a.World Bamboo Day, 2020 theme hi 'Bamboo for green life and sustainable development' a ni a, hemi ni hi mau tangkaina inhrilhhriatna atan khawvel pumah hman thin a ni. World Bamboo Day hi a ni tak chu nimin September ni 18 (Pathian Ni) kha a ni a, remchang zawkna avangin vawiin hian hman a ni.

Vawiin program hi Horticulture Department Secretary Pu K. Lalthawmmawia'n kaihruaiin kalkhawm te lawmna thu a sawi a. Bamboo Processing & Product Development- NECBDC in a buatsaih video clip en ho a ni a, Horticulture Director Dr.Saipari hnen atangin thusawi tawi ngaihthlak a ni a, CSIR IP Coordinator Dr. Sarika Verma hnen atangin Bamboo Processing, a chinpun dan leh hman tangkai dan hrang hrang chungchang power point presentation ngaihthlak a ni bawk a.

He hunah hian mau chingtu mi panga hnenah Best Performorning Farmers' Award leh Rs 5000 Incentive Awards leh Certificate hlan nghal an ni a. Mi engemawzat hnenah Exibition Participation Certificate hlan nghal an ni bawk a.Joint Director Pu C.Lalremsiama chuan lawmthu sawiin session 1 hi a khar a. Session II, Technical Session hi chawhnu lamah hman a ni a, Cultivation of Bamboo, Management Practices and Product Development & Processing chungchang Addl. Director Pu L.Lalhmingmawia Pachuau hnen atanga ngaihthlak a ni dawn a, sawihona hun neih a ni nghal bawk ang.