1981/2022-2023

Aizawl, the 19th September 2022: Vawiin chawhma khan Durbar Hall, Raj Bhavan-ah Governor Hari Babu Kambhampati chuan “State wide adoption of Pradhan Mantri TB Mukt Bharat Ahiyan” chu a hawng a. He hmalakna hian a thil tum chu kum 2025 ral hmaa Mizoram atanga Tuberculosis (TB) natna umbo a ni.

Governor chuan TB natna vei ten an damdawi eipui tura chawtha an mawhmawh te an hmuh theih nan mi tlawmngai leh in phal te an mamawh tih a sawi a. TB natna vei te tana nutrition leina tura sum leh pai thawha rawn penchhuak turin ngenna a siam a ni. A bul tan nan Governor chuan TB vei mi 20 te tana nutrition leina tur kum 1 atan tumsak dawn tih a puang a. Health Minister Dr R.Lalthangliana pawhin TB vei mi 10 te tana nutrition leina tur kum 1 atan a tumsak dawn bawk a ni. Mizoramah TB vei inenkawl mek mi 1360 an awm a. Heng zingah a tam ber te hi mi harsa tak tak an nih avangin tanpuina an mamawh hle a. Tunah hian mi tlawmngai 22 te chuan website link : reports.nikshay.in/FormIO/DonorRegistration ah inziak lutin TB vei te eitur tanpuina ( Food Basket) atan thlatin mi pakhat tana Rs 650 – Rs 1000 chhutin an sum leh pai an thawh mek a ni. 

Kum 5 chhungin Mizoramah TB natna umbo a nih theih a rin thu Governor Hari Babu Kambhampati chuan a sawi a. He beihrualah hian Sawrkar, NGO te, Kohhran te leh khua leh tui zawng zawngte kan inlungrual a, tha taka kan thawhho erawh a pawimawh takzet a ni a ti. TB natna chungchangah inzirtirna uar taka kalpui te, he natna vei te thinrik mai lova ngaihsak nachang hriat a tulna te, he natna hi damdawi hmanga enkawl leh damdawi a thlawna dawn a nih chungchang te leh TB natna chu kai lo tura inven theih a nih chungchang te kan zavaia kan chian hle a ngai a ni tih a sawi bawk.

Governor chuan TB natna vei te hi eizawnna lamah mi harsa tak tak te an nih avang te leh he natna vei chunga hnahram thawh a harsat avang ten tanpui an ngai tih a sawi a. Taksa tichak tur leh TB damdawi hnathawhpui turin TB vei ten ei leh in tur tha an mamawh bawk si avangin anmahni tanpuina atan Nikshay Mitra Programme kaltlangin pawisa kan thawh a ngai a. “ Thla khat a tan chauh emaw thla engemaw chen chhung, kum khat chhung leh a aia rei pawh website link : reports.nikshay.in/FormIO/DonorRegistration ah lut a rawngbawlna rawn nei theuh turin kan insawm a ni”, a ti. Full Speech of Governor Hari Babu Kambhampati : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-state-wide-adoption-of-pradhan-mantri-tb-mukt-bharat-abhiyan-on-19th-september-2022-at-durbar-hall-raj-bhavan 

Health Minister Dr R Lalthangliana chuan tanrual hi chakna tih Hripui Leng donaah a chiang tawh a, khatiang bawk khan HIV/AIDS dona leh Cancer natna titlem tura Beihrual kawngah Sawrkar, Tlawmngai pawl te leh Kohhran ten theih tawp an chhuah tlang leh mek a. Tunah kum 5 chhungah Mizoram atanga TB Natna umbo tum a ni leh a. He thilah pawh hian kan tanrual a pawimawh hmasa ber a. Kan thawhhona a that a, kan inlungrual phawt chuan kan hlawhtling leh ngei dawn a ni a ti.

TB natna umbo tura tehfung atan kum 2015 hman a ni tih a sawi a. Kum 2015 a TB natna thihpui zat aia TB veia thi 80% in a tlem zawk hunah leh he mi kum thoa TB vei awm zat aia 90% a TB vei an tlem zawk hunah hlawhtling anga chhiar kan ni dawn a ni a ti. Mizoramah kum 2015 khan TB avangin mi 38 an thi a – he statistics atanga chhut chuan kum 2025-ah chuan Mizoramah TB natna avanga nunna chan mi 4 aia tam an awm lohna tura hmalak a ngai a ni a ti a. Kum 2015 ah TB vei mi 2145 hmuhchhuah an ni a kum 2025 ah chuan Mizoramah TB vei mi 430 aia an awm tlem theih nan theihtawp kan chhuah a ngai tel bawk a ni a ti.

TB natna umbo turin testing tam tak tih a tul a. Hemi atan hian Central TB Division chuan Mizorama RD Block zawng zawnga bun turin Truenat Machine 26 mamawhna chu a pawmpui tawh tih a sawi a.Tunah hian TB case te uluk taka chhuizui leh a veite umzui an nih theih nan Central TB Division leh Mizoram sawrkar tangkawp chuan TB Test na tha tak - Culture & Drug Susceptibility Testing Laboratory (C&DST Lab), Falkawnah a buatsaih mek a. Hawn thuai theih tura peihfel thawkhat a ni tawh tih sawiin tuna kalpui mek – Guwahati a sample thawn a ngaih avanga harsatna te a tikiang dawn a ni a ti.

Sub National TB Certification hnuaiah 20% a TB natna ti tlem ten an dawn theih, Bronze Medal chu Kolasib leh Serchhip ten an dawn theih tawh avangin dilna thehluh a ni a. Hei hi a hlawhtlin chuan hriatpuina thuziak leh pawisa a keng tel a ni a ti. TB natna vei zingah a tam zawkin tanpuina – food basket an dawng duh tih an tichiang tawh tih sawiin politician, sawrkar hnathawk, sumdawng, pawl ang leh mi mal angin TB Natna vei te tana rawn luang chhuak turin sawmna a siam nghal bawk a ni.

Pi Esther Lal Ruatkimi, Principal Secretary, H&FW in programme a kaihruaiin “State wide adoption of Pradhan Mantri TB Mukt Bharat Ahiyan” chungchang sawihawnna nei a. He hunah hian Governor Hari Babu Kambhampati chuan donor ten Food Basket atana pawisa an thawh chu TB vei thenkhatte hnenah a hlan nghal a ni. He programme pawimawh takah hian Tlawmngai pawl hrang hrang aiawhte sawm an ni a. Dr T.Lalhmangaihi, Principal Director, Dr Lalzepuii, Director, DHS, Dr KK Chhetri, Director, DHME leh official dang te pawh an tel a. Dr Eric Zomawia, MD, NHM chuan lawmthu sawiin huntawp a khar thung a ni.