New Delhi a World Bank hotu, Rahul Ratary leh Abederazaq Khalil ten nimin tlai khan Chief Minister Pu lal Thanhawla chu a chenna bungalow-ah hmuin inkawmna hun tha tak an nei.

World Bank hotute hi tui lam bika hnathawk an nih thu Chief Minister chu hrilhin, India hmarchhak state 3 - Assam, Meghalaya leh Mizoramah tui lam enkawlna tha leh inrelbawlna tha a awm theihna tura World Bankin hmalak a tum thu an sawi a. Tun tuma an lokal hi Mizoram leilung awm dan te, sik leh sa leh thil dang dang rawn thlithlai hmasa a lokal an ni a. Chief Minister chuan World Bank hmalak tumna chu tha a tih thu leh Mizoram chu an hmalakna turah a inhawn thu te sawiin, Mizoram chu tlangram, leimin tamna leh tlangram loneihin (jhum) ramngaw a tihchhiat nasatziate a sawi a. Heng ram chereu nasa tak hi NLUP hmanga siam that anih theih a beisei awm thute sawiin, hei hian tuihna te pawh a tih tam phah ngei a beisei thu a sawi bawk a ni.

World Bank hotute hi DONER Ministry Dy Secretary Pi Mercy Epau in a rawn tawiawm a, kum thar January thla vela lokal leh an inbeisei thu an sawi bawk a ni.

Inkawmna ah Chief Minister hi PHE Minister Pu S.Hiato, Parliamentary Secretary Pu H.Zothangliana, PHE Secretary Pu Nikhil Kumar, PHE Engineer-in-Chief Pu R.Lalfanliana leh PHE Chief Engineer Pu Lalmuanzova ten an tawiawm a ni.