Education Minister Pu Lalsawta chuan Pu Lalhmingmawia Ralte National Award to Teacher – 2011 a dawn lawmna hun leh a lehkhabu ziah ‘ Paris Lamtluang’ tih tlangzarhna hun vawiina Synod Conference Centre-a Award dawngtu in a buatsaih chu khuallian niin a hmanpui.
Pu Lalsawta chuan kum naupangtea Pu Lalhmingmawia’n ram pum huap zirtirtute chawimawina sang ber a dawng chu a lawmpui thu sawiin amah ang zirtirtu tha hi Mizoram in a mamawh tak zeta, anni ang hi pung zel se tiin duhsakna a hlan a. Zirna hi mihring in mahni chauhin a chawr lova, khawtlang, kohhran, hnam leh ram ten an chawr ve tel zel a ni a, a ti a. Mizorama pawikhawitu tam zawk - za zela sawmkua vel chu zirna mumal nei lo annih avangin ram leh hnam siam nan zirna hi a pawimawh thu a sawi bawk a ni.
He hunah hian Prof. R. Lalthantluanga, Vice Chancellor Mizoram University chuan Pu Lalhmingmawia Ralte an ‘Paris Lamtluang’ tih lehkhabu a ziah chu a tlangzarh a ni.
Pu Lalhmingmawia Ralte hian kumina National Award to Teacher – 2011 a dawn bakah kum 2008 a Air India leh Vangliani in zirtirtu tha an thlanah ‘Broad Out-Look Teacher Award’, BOLT Award lo dawng tawh a. 2011 khan ‘State Award to Meritorious & Outstanding Teacher’ hlan a lo ni tawh bawk a, amah hi Lecturer in Govt. Republic Higher Secondary School-ah a thawk mek a ni.
