Sports & Youth Services Minister Pu Zodintluanga chuan vawiin khan Aijal Club-ah NERIST Mizo Zirlai Pawl (NMZP) in an pawl kum 25 tlin ‘Silver Jubilee’ lawmna hun an buatsaih chu khuallian niin a hmanpui.

Pu Zodintluanga chuan Mizo zirlai rampawn hmun hrang hranga lehkha zira awm te pawl anga an intelkhawm chu a that rualin, mahni ringawta awm hi chu a tha ber loa tiin an zirlaipui hnamdangte thian a an siam thiam a pawimawh thu uar takin a sawi a. Mizote hi thil kan thiam zul a mahse master-na nei miahlo tam tak kan awm hi a thalo hle a tiin, an zirnaah hlawhtling tur chuan theih tawp chhuah a taimakna leh rinawmna nen beih a tul a ni, a ti a.

Sports Minister chuan NERIST zirlai kalkawmte chu an thiamna hmang in ram leh hnam tun aia tha zawka siam theih anih thu sawiin zirlai te chu an zirnaah in pum pekin an hun zawng zawng an zirnaah hmang thin turin a chah a. Arunachal Pradesh pumah leh an lehkha zirna hmunah hnam dangten Mizo hi hnam rinawm leh tlawmngai hmuh a min hmuh theihna turin theihtawp in chhuah ka duh a ni, a ti a. He hun a NERIST atanga zirchhuak tawh te leh hna thawk mek te chu an hna ah rinawm taka thawk turin leh an thiamna leh an theihna zawng zawng chu Mizoram tan hmang zel turin a chah a, kalkhawm te chu Krismas leh Kumthar duhsakna a hlan bawk a ni.  

Pu Zodintluanga chuan Silver Jubilee puala Souvenir buatsaih chu a tlangzarh nghal a, NZMP hruaitu hlui te ngaihhruina a hlan bawk a. He hun hi Pu H. Lalsawmliana, President, NERIST Alumni Association of Mizoram chuan (NAAM) kaihruaiin kalkhawnte lawmna thuchah chu Pu Zaukhana, Chairman, Silver Jubilee Organising Committee chuan a sawi a. Pu S.Biakliana, General Secretary, NMZP leh Pu Chungliantluanga General Secretary, NAAM te chuan Report tawi an pe bawk a ni.

NZMP ah hian member in register 450 an awm a, mi 160 chu he zirna in atanga zirchhuak te an ni a. Tunah hian NERIST ah Mizo zirlai 80 vel an awm mek a ni.

North Eastern Regional Institute of Science & Technology (NERIST) hi hmarchhak a chengten  Science & Technology  lama hma an sawn theihna turin a bika din a ni a.  Engineering discipline hrang hranga Diploma, B. Tech, M. Tech, MBA bakah PhD(Forestry) zirna pawh a awm a. NERIST atanga pass chhuak tawh te hi Mizoram sawrkara Department hrang hrang ah leh Private Sector lian tak takah mi eng emaw zat thawk an awm mek a, mahni a sumdawnna ti an awm nual bawk a ni.