Nimin khan Home Minister Pu R Lalzirliana chuan Saitual, Chawnpui Veng Community Hall a hawng.

Home Minister chuan Mizo nunze mawi, tlawmngaihna, taimakna, aia upa zahthiamna te vawng nung zel turin thangthar ten mawh kan phur, a ti. Duhlian tawng hmang chauh hi Mizo hnam kan ni lo tih sawi nawnin Mizo hnam humhimna leh tundinna tur chuan zim taka insawrbing lovin, hak kan zauh zel a tul a ni, a ti a. Mizoram leh Mizo khawtlang nun hmasawnna tur thil tha nia kan hriatah chuan tu te pawh hi zam mai lova, kan tum ram kan thlen hma chu huaisen taka hmalam pan zel tur kan ni, a ti. Home Minister chuan Saitual leh a chhehvel hmasawnna turin nasa taka sorkarin tan a lak thu sawiin khaw chhehvel zirlai Saitual khuaa zirna in hrang hrang bela lo lut te chenna tur mi 100 awm theihna Hostel sak mek a nih thu te; Boys and Girls Hostel sak a nih tur thu te; Fire Station dahna turin quarters sak tan mek a nih thu te; Sub Jail sakna tur Sihfa ramah en mek a nih thu te; Aizawl District Development Committee Headquarters atan Saitual thlan a nih thu te a sawi a. Kum reilo te chhungin nasa takin Saitualin hma a sawn tiin, a changtlun zelna tur ngaihtuah chhunzawm zel a tum thu Pu R Lalzirliana hian a sawi a ni. Home Minister chuan sorkarin mipui tel lovin ram nuam a siam theilo tih sawiin NLUP kaltlanga sorkarin mi rethei zawkte bul a tan sak mek lai hian a dawngtu ten taimaknain an umzui tur a ni, a ti a. Mi taima leh thahnemngai te chuan NLUP hlawhtlinna an hmu tan mek a, an la hmu chho zel dawn a ni, a ti bawk.

Saitual Chawnpui Community Hall hi Non-Lapsable Central Pool of Resources (NLCPR) sum cheng 54,36,720 senga sak a ni a. A building zau zawng hi 166.50 square metres niin kumin February thla khan a sak hna hi thawh tan a ni. Community Hall thar lawmna senso atan Pu R Lalzirliana hian cheng 10,000 a hlan.

Hall hawnna inkhawm hi Pu Ngursailova Sailo, Chawnpui Branch YMA President in a kaihruai a. Er J Sangkhuma leh a satu Contractor ten report an pek bakah Saitual Village Council President Pu Lalduhawma Sailo pawhin thu a sawi a ni.

Home Minister Pu R Lalzirliana hian ni 13.12.2012 leh 14.12.2012 khan Saitual, Keifang leh Tuikhurhlu ah kumin chhunga mitthi chhung te a ral a. Nimin khan Salvation Army enkawl lai hnuchham in, Hlimna run, hmeichhe naupang 50 chenna tlawhin tanpuina sum cheng 10,000 a hlan bawk a ni.