Mizoram State AIDS Control Society(MSACS) leh Association for Voluntary Blood Donation(AVBD) te buatsaihin vawiin June 14, World Blood Donor Day chu I&PR auditorium ah hman a ni a. Sports & Youth Services Minister Pu Zodintluanga chu Khuallian a ni.

Kumin World Blood Donor Day ah hian Central KTP hnenah Annual Blood Donors Special Award hlan a ni a. Kum 2015-2016 ah CKTP hian Aizawl Civil Hospital ah leh Presbyterian Synod Hospital ah thisen unit 3064 an pe a ni.

Khuallian Pu Zodintluanga chuan khawvel thiamna in a siam chhuah theih loh thisen hlu tak, a thlawna pek chu hmangaihna lan chhuahna a ni, tiin a thlawna thisen pe thinte chu ‘Tlawmngaihna Nopui dawmtir a, chawimawi an phu a ni,’ a ti a. Kumin World Blood Donor Day thupui “Blood connects us all” tih chuan khawvela mi chi hrang hrang te hi dinhmun leh nihna in ang lo tak tak ni mah ila, thisen in a thlun khawm kan ni tih a tarlang chiang hle a ni, a ti. Kum 2010 khan Aizawl Civil Hospitalah Model Blood Bank din a ni tih sawiin Pu Zodintluanga chuan Association for Voluntary Blood Donation hmalakna avangin a thlawna damlo te tan thisen pek pawimawhna hi mipui rilru ah a tla na tial tial a ni, a ti a. Thisen pek pawimawhna leh mi hrisel pangngai tan a hlauhawm lo tih thalai ten an hriat zau zel na turin World Blood Donor Day hmanga lo kal zirlaite chu midangte tih hmuhtu atan tang turin a chah bawk a ni.

Vawiinah chuan mi 10 hnenah Regular Blood Donor Badge hlan a ni a. Mipa zingah Tv.Lalremruata Electric Veng chu Mizorama thisen pe ngun ber niin vawi 61 a pe tawh a. Hmeichhe zingah Pi Rebecca Saimawii Khatla chu thisen pe ngun ber niin vawi 45 a pe tawh a ni.

Kum 2016 Annual Blood Donor Awards hi category 4 ah thenin heng pawl hrang hrang te hnenah hian hlan a ni bawk a Religious Category :

1. Youth Evangelical Front, Kohhran Thianghlim

2. TKP Co-ordination Committee

3. Salvation Army Youth Central Corp, South Division

YMA Category :

1. Khawzawl Group YMA

2. Bethlehem Vengthlang Br. YMA

3. Joint YMA Saitual

Education Institutions :

1. NSS PachhungaUniversity College

2. NSS Govt.Hrangbana College

3. NSS Govt.Johnson College

Miscellanous category :

1. MPYCC

2. New Market Association

3. 225th Bn.CRPF

World Blood Donor Day programme hi Pu Lalrinliana Fanai, Commissioner& Secretary, H&FW & Chairman, SBTC in a kaihruai a. Dr.Lalmalsawmi Sailo, Project Director, MSACS in World Blood Donor Day chungchang leh a thlawna thisen pek kawnga Mizoram dinhmun leh hmalakna tlangpui report a pe a. Pu C.Lalnunnema, General Secretary, AVBD pawhin an pawl hmalakna tlangpui tarlangin report a pe bawk a. Dr.K.ropari, Principal Director, H&FW in lawmthu sawiin hun hnung a khar a ni.