Vawiin khan 'khawvel pum huap -  athlawna thisen pek ni' vawi 7 na pual in blood donation camp-cum-awareness programme chu Chanmari YMA Hall, Aizawl ah hman ve a ni. He programme Mizoram State Aids Control Society(MSACS) leh Association for Voluntary Blood Donation, Mizoram(AVBD) tangkawp buatsaih ah hian Pu Van Hela Pachuau, IAS, Chief Secretary, Health Department changtu ni bawk chu khuallian a ni. Thisen pekna hun hi zing dar 10  khan Pu Lalbiakthanga, President, AVBD chuan Chanmari YMA Hall chhawng hnuaiah a hawng a. Hemi  hnu hian Inkhawmna hun tawi Hall ah Dr. Eric Zomawia, Project Director, MSACS in a kaihruai a, chawhnu lamah intihhlimna hun hi Pu C.Dinthanga leh Nula Chuauzikpuii'n hneh takin an huaihawt.

Vawiin Blood Donation Camp a thisen thianghlim lak khawm te hi Aizawl Civil Hospital leh Durtlang Presbyterian Hospital Blood Bank ah mamawhtute hman atan dah that a ni ang. Doctor leh Medical Staff thahnem tak vawiin Blood donation camp ah hian an rawn thawk chhuak a. Athlawna thisen pek tum hi an tam hle a- School naupang, College kallai leh mi tlawmngai tam takin vawiin tlai dar 3 thleng khan a  mamawh tute hman atan an thisen thianghlim an  pe a ni. Vawiin thisen pek unit 115 hi Aizawl Civil Hospital tan leh Unit 73 Durtlang Hospital tan ruahhman a ni.

Chief Secretary chuan tunlaiin Mizoramah mi dangte tana nun leh rawngbawlna a lo chuai  tan ta mai chu harh a bul tan that vat a tul a ni a ti. Changkanna in a ken tel ni mai awm alang ; mi dang aia chungnun zawk tumna te, midang ngaihtuah lek lova mahni hamthatna um a hmasial leh hlawkna tel tum a intlansiakna hian Mizo nun hlu inhmangaihna leh inunauna a eichhe nasa tawh hle niin a sawi. Hlawkna leh hamthatna um miah lova athlawna thisen pe thin te chu Pathian rawnngbawltu dik tak  an ni a ti. Mahatma Gandhi leh Mother Teresa an ropuina chu midangte tan a an nun vang anih thu a sawi. Nun ropui ber chu midang te tan a nun hi a ni a, chu chu nun tam neihna leh dam reina a ni a ti. Midangte tan a nun leh midangte hmangaihna a huang zauh hi Mizoten kan zir that leh loh chuan Mizo nih hi hnamdang nih aiin a nawmna a awm bik chuang lovang a ti.

Inkhawm kaihruaitu Dr. Eric Zomawia chuan World Blood Donors' Day chu World Health Organisation(WHO) leh a thawhpui ten Dr.Karl Lanstainer, A,B leh O Blood Group hmuchhuaktu leh thisen thianghlim inpekna a sulsutu hriatreng nan leh khawvel pumpui a midangte nunna chhanna atan  athlawna thisen petute chawimawina atan kum 2004 atangin a lo hman tan tawh thu a sawi. Mizoram ah Blood Bank 10, district 8 ah 1 theuh bakah Serkawn Baptist Hospital ah 1 leh Presbyterian Hospital, Durtlangah 1 a awm thu a sawi.Thisen athlawna dawngtu atangin Pu Lalsanga, Hlimen in lawmthu sawina  a neih hnu in thisen athlawna thisen pe thintu zing atangin Pi Zothantluangi, Mission veng atangin fuihna thu ngaihthlak a ni.Hrangbana College zirlai ten Lemchan tawi hmuhnawm leh awmze nei tak an entir bawk.