Vawiin chhun dar 12:30 khan ‘World Blood Donors Day 2013’ chu Chhimveng YMA Hall, Mamit-ah hman a ni. Pu Benjamin Lalzama SDO(S) Mamit in khuallian niin a hmanpui.

‘Worlds Blood Donors Day’ hmanna hun Dr H.B. James, Senior Medical Officer, Mamit kaihhruaiah khuallian chuan mite nunna chhan nana thisen pe thin tute fakawm a tih thusawiin Pathian thil thlawn pek ropui tak hmanga mi dangte tana kan thisen kan peka malsawmna kan ni thei hi a hlu em em a ni, a ti a. Mizo tlawmngaihna nen pawh a inhmeh hle a ni tiin, kan mihringpui damlo mangangte nunna chhan nana kan thisen te ui lova pe-a, malsawmna thlentu ni zel turin kalkhawm te a sawm a ni.

Dr Vanlalsawma, Chief Medical Officer, Mamit pawhin thu sawiin mihrisel pangngai tan thisen pek hi a a hlauhawm lova, kan pek chhuah loh pawn a kalral tho tho a ni, a ti a, midangte nunna chhan nana hlu ber chu thisen hi a ni tiin tunlai hunah thisen mamawhna a sang chho telh telh a, a mamawhtute tana thisen pek uar deuh deuh a tul hle a ni, a ti bawk.

Pu M.S Dawngliana Hnamte, Secretary AVBD, Mamit District in an hmalakna tlangpui sawiin kum 2010 a tangin AVBD, Mamit District hi din niin khawpui chhung YMA Branch ten a indawta thisen an pek dan tur Blood Donation Calendar siam a nih thu te, awarness campaign hmanga hmalak thin a nih thu leh Mamit-ah chuan fur khua-a current neih mumal loh avanga harsatna an tawh thin thu te a tarlang a ni. Kum 2012-2013 chhung khan Mamit District Hospital Blood Bank-ah thisen 292 dawn niin 290 hi Voluntary a dawn a ni. kum khat chhunga Hospital-a thisen mamawh zat hi 200 units bawr vel a ni a.

Kum 2012-2013 chhunga pawl ang leh mimal anga thisen pe tha te hnenah lawmman siam niin pawl anga thi tha te hi 1-na Hmunsam Pastor Bial KTP; 2-na Bazar Veng YMA; 3-na Lungsir Branch YMA te an ni a. Mimala thisen pe tha mi pahnih 1. C.K Lalhrilliana, Mamit Charkawn - 4 units leh 2. na C. Lal Zarliana, Venglun Mamit - 3 units te niin lawmman te hi khuallian hian a hlan nghal a ni.