July ni 1, 2013 atanga Union Home Secretary hna chelh tan tur, tuna OSD, Ministry of Home Affairs ni mek, Pu Anil Goswami chuan vawiin khan a vawi khatna atan Mizoram a rawn tlawh a. Vawiin chawhma lamah Champhai a tlawh hnuah Aizawl-ah lo kir lehin, chawhnu dar 3:00 khan Mizoram Chief Secretary leh state sorkar officials pawimawhte nen Chief Secretary’s Conference Hall, New Secretariat Complex-ah meeting an nei zui nghal a ni.

He meeting pawimawh takah hian Chief Secretary Pi L.Tochhawng chuan Mizoram chu Myanmar leh Bangladesh nen thui tak in ri a nih avangin ramhimna lamah inthlahdah theih a nih lova, chuvangin Home Ministry atanga ‘Security Related Expenditure’ (SRE) an hmuh loh thin chuan venhimna hna a tih bahlah thu a thlen a, hemi chungchang hi Pu Anil Goswami chuan a lo enzui nghal tur thu in a chhang a ni. OSD Home nena meeting neihah hian thil pawimawh tam tak an sawite zingah 4th & 5th IR Bn. te tana sum mamawh thu te, police thuam chak chungchang te, Bru hruai kir leh ramri hung hna kal mek chungchang te an sawiho a ni.

OSD Home Pu Anil Goswami chuan Mizoram Governor Pu Vakkom Purushothaman chu a chenna inah hmuin Mizoram chu ram mawi tak, khualzinte hip thei tak a nih thei thu te leh Mizote chu lehkha ziak leh chhiar tamna state a nih angin hmasawnna kawngah pawh kal chak hle nia a hmuh thu a sawi.

Vawiin tlai vek khan Pu Anil Goswami chuan Mizoram Chief Minister Pu Lal Thanhawla chu a chenna inah a hmu a, Chief Minister nen Mizoram tana thil mamawh tam tak an sawidun a ni. Chief Minister chuan SRE chungchang ngai pawimawh tura chah nawn lehin, police te chenna tur hmun leh in sak a tul thu a lo hrilh bawk a ni.