Vawiin khan Edenthar Branch YMA chuan an din champhaphak vawi 25-na Edenthar Govt. Middle School tualzawlah an lawm a. Parliamentary Secretary to Chief Minister Pu Lal Thanzara chu khuallian a ni.

Pu Lal Thanzara chuan khawvel hnam dang te neih ve loh YMA chu chanchintha avanga kan neih, missionary te din niin a din chhan ang ngeiin midang te tan malsawmna, khawtlang leh hnam rohlu a ni, a ti. YMA chu ram, khawtlang, sorkar, chhungkua leh mimal tan malsawmna a ni tiin ram leh hnam humhalh nana an hmalakna hrang hrang zingah Aizawl kawtchhuah maia thlawhna hmanga khualzin lo lut apiangin an paltlang thin Zu zawrhna hmunpui awm thin pawh YMA hmalakna avangin thenfai a ni a; ruihhlo, zu leh ruihtheih thil dang dona  kawnga YMA hmalakna hian thalai nunna tam tak a chhanhim a ni, a ti. Parliamentary Secretary chuan YMA chu sorkar kutke pawimawh tak a ni tiin khua leh tui dik tak te chauhvin Voters ID an neih theihna tur te, dan lo anga Mizorama lo lut zawn chhuah kawngah te, thing leh mau chereu tur venna leh tuihna humhalh kawngah te thlengin sorkar tan an tangkai hle a ni, a ti a. Zonunmawi, tlawmngaihna, aia upa zahthiam leh nun dan tha inzirtirna kawngah YMA thathawh a ropuiin ram leh hnam tan rohlu an tling takzet a ni, a ti bawk. Pu Lal Thanzara chuan Edenthar Branch YMA- in an din champhaphak vawi 25-na an thleng thei chu lawmpuiin he dinhmun hruai thlengtu Pathian a ropui a, an hruaitu kal tawh te leh an hruaitu ni mek te thawhrimna fakawm tiin an kal zelna turah duhsakna a hlan a ni.

Khuallian hian Edenthar Branch Silver Jubilee Souvenir a tlangzarh nghal bawk.

Edenthar Branch YMA hi kum 1985 May ni 16-ah Chaltlang Branch YMA hnuaiah M-III Section angin a bet a, kum 1987-ah VC hran an nei a, kum 1988 January ni 22-ah Branch YMA hruaitu hmasa ber thlangin Edenthar Branch YMA  a lo ding ta a ni. Tun dinhmunah YMA member mipa 564, hmeichhia 286, an vaiin member 850 an awm a.  Section pathumah inthenin Branch OB, Adviser leh Executive Member 71 ten an kaihruai a ni.

Silver Jubilee lawmna inkhawm, an Branch President Pu B Lalchhuangliana kaihhruaiah hian an Branch OB lo ni tawhte chawimawina hun an hman bakah  Football, Volleyball leh hnam lama intihsiakna te an nei a ni.