1615/2022-2023

Aizawl the 16th August, 2022 : Mizoram Police chu 'World Book of Records' Gold Edition pahnihah telh a ni. Ni 24.6.2022 a ruihhlo halral runpuia ruihhlo kg 930.229, International Market rate-a Rs 23,62,09,40,245/- (Vaibelchhe sang hnih zathum sawmruk pahnih, nuai kua, sing li, zahnih sawm li panga) halral kha vawikhata ruihhlo tihralna lian ber a nih bakah nungcha tawlh ruk manna lian tham ber, nungcha 468 zet manna avang tein "World Book of Records 2022 Gold Editions" - ah Mizoram Police hming hi a lang ve a ni.

World Book of Records, London te chungah Mizoram Police chuan ruihhlo leh dan lova thil tawlhruk kan beihletna kawnga kan thawhrimna leh kan inpeknate min hriatpui a, khawvel hriata min tarlan sak avangin tihtakzetin lawmthu kan sawi a ni.

Hetiang dan lova thil tawlhruk te, ruihhlo leh sualna kan beih letna kawnga mipuite thawhpuina engtiklai pawha kan dawn thin avangin Mizoram Police chuan mipuite hnenah lawmthu a sawi mawlh mawlh bawk a ni.

Tin, kan ram, Mizoram chhunga remna leh muanna a lo pun zel a, ram nuam leh zual a lo nih theihna turin Mizoram Police chuan theihtawpin heng dan lova chetna hrang hrangte hi a do zel dawn a, mipuite pawh min thlawp tlat zel turin kan sawm tak meuh meuh a ni.