1614/2022-2023

Aizawl, the 16th August 2022  : Chief Minister Pu Zoramthanga chuan nimin August ni 15 khan Deputy Commissioner Office, Aizawl District buatsaih lehkhabu “Picture through the Ages’ - A Documentation of the Journey of Aizawl : Its land, its art, its history, its people and their stories and its enigma, Aizawl Club ah a tlangzarh.

Chief Minister chuan hetiang lehkhabu rotling  buatsaih a ni hi ropui a tih thu sawiin, a buatsaihna atana sulsutu Deputy Commissioner Office te leh Editorial Board Member te thiamna leh inpekna te lawmawm a tih thu a sawi. Beng ringawt a hriatna hi chu a nghet tawk lo va, chuvangin Mizo history benga hriat tih ngheh nan mit ngeia hmuh theih leh ziaka chhiar theih tur kan lo neih belh leh thei ta hi a hlu tak zet a, chuvangin he lehkhabu hi thangtharte tan hriatna tizautu leh lehkhabu rawn tlak leh rotling a nih ngei a beisei thu Chief Minister chuan a sawi.

Deputy Commissioner Dr. Lalhriatzuali Ralte IAS chuan DC Office in hetiang lehkhabu a buatsaih chhan sawiin kum 75 India zalenna hi a hlimawmzia leh a hlutzia pholanna chikhat atan leh engangin nge hma kan lo sawn chhoh tih lantirtu atan te, kan state-ah tun hma sapho min awp hma leh hnua kan chanchin  te chhinchhiah a lo nih nan te, Mizo nun leh khawtlang ziarang te theihnghilh a nih loh nan leh thangthar lo la awm turte pawhin an lo hmuh a, an lo chhawr tangkai theih tur atan te, zirmite leh khualzinte tan an hriatna tizautuah leh, Aizawl District hi a lo hriatfiah zawk nan, Aizawl DC Office-a lo thawk tawh DC leh Officer  leh staff zawng zawng te thawhhona tha leh thawh rah te  pawh han pholan nan te buatsaih a ni 

Lehkhabu Convener Prof. R.L. Thanmawia’n thlirlawkna neiin lehkhabuah hian thlalak 600 chuang a awm thu leh hmun 13 a then a nih thu a sawi. 

Lehkhabu tlangzarh inkhawmah hian MLA Pu C. Lalmuanpuia, Pu H. Biakzaua, Pu Zothantluanga leh Pu K. Laldawngliana te bakah Aizawl Deputy Commissioner lo ni tawh te Pu P. Rohmingthanga, IAS(Rtd), Pu Vanlalngaihsaka, IAS(Rtd) leh mi pawimawh dang te an tel a ni.

Attachment

  • Loading attachment...