Vawiin khan Health & Family Welfare Minister Pu Lal Thanzara hovin Chanmari YMA Hall-ah National Programme for Prevention & Control of Cancer, Diabetes, Cardiovascular Diseases & Stroke (NPCDCS) leh National Programme for Prevention and Control of Deafness (NPPCD) tangkawp buatsaihin World Cancer Day hman a ni. He ni pual hian inkhawm buatsaih a nih bakah a thlawna inentirna Special Non Communicable Disease (NCD) Clinic hawn a ni bawk.

Health Minister Pu Lal Thanzara chuan he ni puala cancer natna inzirtirna leh a thlawna inentirna an buatsaih chu lawmawm tiin heti taka Mizote zinga cancer a hluar hi kan tan tlan chuan kan ti kiamin kan ti tlem thei a ni, a ti. Minister chuan kum 2014-a Mizoramah NPCDCS bul tan a nih atanga kum hnih hnuah thawktu 100 chuang zet awmin District 6 lai an lo tuam hman leh hmun hrang hranga inentirna hawnga mipui an zirtir thin chu hmasawnna duhawm tak a ni, a ti a. Cancer chu a tir te a hmuhchhuah a nih chuan za a sawmkua enkawl dam theih a ni a, Mizoram mipui nunna suattu ber cancer hi thlir liam mai lova a do nan leh a tihkiam nan theihtawp a tan la turin kalkhawmte a sawm a ni. Pu Lal Thanzara chuan Zemabawka Cancer Hospital tih changtlunna tur project chu sawrkar laipuiin a pawmpui tawh tih sawiin NPCDCS hnuaiah Rs.45 crore chu phalsak tawhin a thawh khatna Rs. 14.64 crore release a ni tawh, a ti a. He sum hmang hian cancer hospital changtlung, khum 100 awmna siam tum niin inenkawlna khawl tha tak tak pawh bun a ni ang, Health Minister chuan a ti.

He huna khual zahawm Health Commissioner & Secretary Pu Lalrinliana Fanai pawhin thu sawiin nun uluka, ei leh inah fimkhura, zuk leh hmuam leh chin thalote bansan turin kalkhawmte a chah a. Mahni hriselna ngai pawimawha invenna lam uar tur leh, a tirte a hmuhchhuah anih chuan cancer chu enkawl dam theih a nih hriaa inentir uar turin mipuite a sawm a ni.

Kumin World Cancer Day ah hian thupui “We can, I can” tih chu thlan a ni a. He natna tihbaiawm tak do tur hian tihtheih kan nei theuh tih hriaa mahni theihna zawn theuh a tan la tur kan nihzia in zirtir chu a tum ber a ni. He thupui hi kum thum chhung hman tur a ni.

World Cancer Day puala inkhawm buatsaih hi Health & Medical Education Director Dr.Lalbiak Kima’n a kaihruai a. National Health Mission (NHM) Mission Director Dr K.Lalbiakzuala, State Nodal Officer (NCD) NPCDCS Dr.Eric Zomawia, Head of Department (Surgery) Dr Saia Chenkual, Mizoram State Cancer Hospital (MSCI)-a Medical Oncologist Dr Jeremy L.Pautu leh Mizoram Cancer Care Foundation Vice President R.Lalramengzami ten thu an sawi a. Health Services Director Dr.Rohmingthanga Ralte chuan lawmthu sawiin hun hnung a khar a ni.