March ni 15 hi khawvel pumah kum tin consumer-te chanvo humhalhna ni ‘World Consumer Rights Day’ atan hman thin a ni a, kumin-ah pawh “Be financially literate : Save your investments” tih thupui hmangin he Ni hi hman a ni. Mizoram-ah pawh Aizawl bakah district hrang hrangah he Ni puala hun hman niin Aizawl-ah chuan tukin zing dar 6:00 khan Kulikawn atanga Chanmari thleng kawngzawh a ni a. World Consumer Rights Day 2010 Rally neih zawhah Vanapa Hall kawtah he Ni puala inkhawm buatsaih a ni leh a, FCS&CA Minister Pu H.Rohluna chu Khuallian a ni.

FCS&CA Minister chuan consumer te chanvo leh dikna humhim pawimawhzia hria a, Mizote pawhin World Consumer Rights Day hlutna chang kan hre tulh tulh hi a lawmawm hle a ni, a ti. India rama mihring vaibelchhe za chuang zingah Mizote chu nuai 10 emaw chauh kan ni a, tunlai khawvel sum leh pai peihpun dan (investment) chungchangah kan khawvel tawn a la sang lo hle bakah financial literacy kan tlachham  hle mai a. Chumi avang chuan midangten an tih duh loh tur thil chiahpuam angahte mi tam tak kan buaiin pawisa tam tak kan hlauh phah bawk a ni, a ti. Sum peipun theihna chi hrang hrang Dan hnuaiah siam vek a ni a, Dan pawn lama duham avanga hlawk tum hi kalsan ang u tiin mipuite a chah bawk. Vawiin Consumer Day denchhenin leh a thupui ngaihtuah chungin consumer-te chanvop humhim tur chuan Dan huam chhungah chauh investment ti thin turin mipui zawng zawng Minister chuan a sawm a ni.

Vawiin World Consumer Rights Day puala inkhawmah hian Mizoram Consumer Union Vice-President Fabian Saimawia kaihhruaiin Consumer Rights humhalh zel tura thuchham sawirual a ni bawk.