3843/2022-2023

Khawzawl, the 15th March, 2023: Vawiin chawhma dar 11 khan World Consumer Rights Day 2023 pualin Khawzawl DC Conference Hall-ah 'Empowering Consumer's Through Clean Energy Transitions' tih thupui hmanga hun hman a ni. He hun hi Pu Lalvenhima, Addl. DC Khawzawl chuan khuallian niin a hmanpui a ni.

Khuallian Pu Lalvenhima, Addl. DC Khawzawl chuan mitinte consumer kan ni a, kan dikna leh chanvo neihte erawh kan hriatchian a ngai hle a ni, a ti a. Consumer-te vuivaina leh lungawilohna thlenna tura District tina din District Consumer Redressal Commission hman tangkai a tul thu sawiin, tun dinhmunah case lian tham kan nei lo hi lawmawm tih tur nge, hmalakna tur tih pawh ngaihtuah tham a ni, a ti bawk. Hnawm hnawk anga chhiar paih mai tura tihte tangkai zawka hman thiam a pawimawh thu pawh sawiin, faina kawnga hmasawn turin kan thil hmante uluk taka paih hi kan inzirtir a tul a ni, a ti a. Boruak bawlhhlawh Carbon dioxide pe chhuak thei sumdawnna lian industry, motor leh adangte bikah ram dang nena ngaihtuah chuan kan dinhmun a tha rih hle a, motor hlui lutuk hman loh erawh kan kalpui a tha hle a ni, a ti bawk.

Khawzawl District chhunga clean energy siam chhuah kawnga pawimawh tak Vankal Solar Park siam a ni chu lawmawm a tih thu sawiin, hei hi World Consumer Rights Day 2023 thupui thlan Clean Energy Transitions tih nen pawh a inhmeh hle a ni, a ti a. Energy thianghlim, him leh hman nawn theih that zia leh tangkainate uar zawka inzirtir tam a tul thu pawh a sawi a. Kalkhawmte chu consumer dangte tih hmuhtu leh zirtirtu nih tum theuh turin a sawm a ni.

Resource person Er. Liantluanga Chohte, EE, PHED Khawzawl chuan clean energy pawimawhnate a sawifiah a. PHE Department kaltlanga Khawzawl District chhunga nizung chakna hmanga tuilak a nih dante tarlangin, District chhung khaw 16 ah nizung chakna hmangin tui an la mek a, heng zinga khaw 5 te chuan an hmang tan tawh a ni. Resource person dang Pi C.Zothansangi, JE, P&E Department Khawzawlin Clean Energy Transitions chungchanga hmalakna langsar zualte tarlangin, 'One Energy, One Transmission' chungchang a sawifiah a. Heng bakah hian District chhunga clean energy siamna kawnga project lian tak Vankal Solar Park chungchang a sawifiah nghal bawk.

He hun hi Pu R.Lalthawmmawia, President, District MCU chuan a kaihruai a. SDO Sadar Pu James Lalnithanga, Registrar, District Commission hnen atangin District Commission chungchang ngaihthlak a ni a. Pu K.Lalnunsanga, President, Sub-Hqrs. YMA Khawzawlin lawmthu sawiin hun hman hi a khar a ni.

Attachment

  • Loading attachment...