3842/2022-2023

Dated Serchhip, the 15th March, 2023: Vawiin khan Serchhip DC Conference Hall ah World Consumer Rights Day, 2023 pualin hun hman a ni a. Pi Nazuk Kumar, IAS, Bawrhsap chu khuallian a ni.

Thusawiin Pi Nazuk Kumar chuan, Consumer Rights Day kan hman chhan ber chu thil leitu (consumer) ten dikna chanvo hlu tak kan nei tih inhrilhhriatnan a ni thin. Thil zawrhna hmun leh zawrh dan phungte a inthlak chak em em a, bungrua leh hmanrua pawh a thar tha zawk a pung zel a. Sum leh paia inbumna pawh a pung zel tih kan hria a ni. Heng thil zawrh leitute hian online hmangin kan lei a ni emaw offline hmangin kan lei emaw Consumer kan nih angin dan hnuaiah engkim fel leh dik taka leitu kan nihna tura min vengtu dan leh chu dan kengkawhtu chak tak chu kan nei a ni tih i hria ang u. Tin, engpawh lei dawn ila kha kan thil lei kha enge a nih chiah tih chiang taka kan hriat a tula, chutianga fiah taka va hriat hmasak te hi kan chanvo a ni. Thil lei leh hralh thuah inbumna lam engmah a awm loh nan chanvo tha tak kan nei tih hi vawiinah hre thar leh ila, mipuite pawh uar lehzualin i hrilh hria ang u, a ti a ni.

He hun hi Pu Lalthanmawia, Serchhip DCSO, Member Secretary, District Consumer Protection Council chuan a kaihruai a, kum hnih kal ta chhungin Serchhip district ah Consumer Case 16 a luh thu leh chin fel vek tawh an nih thu a tarlang a ni. He hunah hian Pu Laldinpuia, Secretary, Serchhip District Consumer Association chuan “Home Delivery, Consumer Rights, Basic Rights, Grievances” tih thupuia hmangin thusawina hun a nei a. Pu Robert Zosangliana, Manager, Lead Bank, Serchhip District chuan “Cyber Crime” tih thupui hmangin thusawina hun a hmang bawk.

Kumina World Consumer Rights Day thupui hi “Empowering Consumers through Clean Energy Transition” a ni.