Khawvel huapa mihringte tana thawktu Art of Living chuan kum 35 a tlin lawmnan ni 11-13 March 2016 khian New Delhi ah World Culture Festival a buatsaih dawn a, Chief Minister Pu Lal Thanhawla chu Khualzahawm ni turin an rawn sawm.

Art of Living hi Sri Sri Ravi Shankar ina din niin, khawvel ram 152 ah a inzarpharh mek a. Khawvel mihring chitin inkarah inhriatthiam tawnna a thlen theihna tura hnathawktu a ni a, a thupui pawh ‘Khawvel Chhungkaw khat’ tih niin, hringnun hi hlim leh lawma siam a duh ber a ni.

World Culture Festival-ah hian thiamna bik neite, mi hmingthang leh hmingtha te fuankhawm tir tum a ni a, ram hrang hrang ina an neih lam, rimawi, arts leh yoga thlenga pholan tum a ni a, dawhsan dangdai tak, thlarau leh sakhaw hruaitute, political leader te, remna leh muanna duhtute leh lam zai miten khawvelah remna leh inunauna a awm theihna tura an auchhuahpuina tur siam a ni bawk dawn a, mi maktaduai 3.5 vel tel tura beisei a ni. Festival hi Prime Minister Pu Narendra Modi in a hawng ang.

Chief Minister rawn sawmtu Art of Livinga Co-Chairman Justice R.C.Lahoti chuan he festivalah hian Mizo lam leh zaimite tel ve tiin, ruahmanna siam turin Chief Minister hi a rawn ngen bawk a ni.

Art of Living-ah hian khawvel ram hrang hrang hruaitute chu member an ni.