Calcutta Mizo Welfare Association (CMWA) buatsaihin Kolkata Mizote chuan March ni 5 (Inrinni) khan Ballygunge Mizoram House-ah hlim takin Chapchar Kut an hmang a. Mizoram Youth Commission Chairman Pu T.Sangkunga chu Kut Pa niin he hun hi a hmanpui a ni.

Pu T.Sangkunga chuan Mizote’n pi leh pute hun ata tawh Kut kan hman thin zinga pawimawh ber Chapchar Kut ropui taka Kolkata khawpuia cheng Mizoten an hmang thei chu lawmawm a ti a. He Kut hian Zofate thinlungah inunauna leh inpumkhatna te, hnam dangte neih ve loh zonunmawi tlawmngaihna leh aia upa zahthiamna te bakah Mizo culture leh nunphung chawinun zelna tur hmanraw tha leh tangkai a ni, a ti. CMWA hruaitute fakin Mizoram Youth Commission kaltlanga Kolkata khawpuia Mizo thalai hnathawk tura kal te an lo tanpui thin te, harsatna an neih apiangin nu leh pa chan changa an lo buaipui thin te chu lawmawm tiin Mizo thalai hna hmu lo te hna thawh tur zawnsakna kawngah an thawhhlawk hle a ni, Pu T.Sangkunga chuan a ti bawk.

Kut Pa Pu T.Sangkunga hian Kolkata Mizo Welfare hnenah Rs 20,000 a hlan a, Kolkata Mizo zirlaite hnenah Rs.5,000 a hlan bawk.

Chapchar Kut lawmna inkhawm hi Calcutta Mizo Welfare Association president Pu H.Lalzirliana chuan a kaihruai a. CMWA Vice President Pu Laima Chozah, IAS pawhin thu a sawi a ni. Pu T.Sangkunga hi MYC Under Secretary Pu Lalsawmzuala'n a tawiawm a ni.