Khawvel pum huapin International Labour Organisation (ILO) chuan kum 2002 atang khan June ni 12 chu naupang chhawrhluih do Ni 'World Day Against Child Labour'-ah a puang a. He Ni hi kuminah chuan Pathian Ni a nih avangin hemi pual inkhawm hi vawiin khan I&PR Auditorium-ah Mizoram State Legal Services Authority, Aizawl District Legal Services Authority leh AIKO huaihawtin hman ve a ni a. Mizoram State Law Commission Chairman Pu R.Lalrinawma Khuallian niin Dan leh Hrai thiam, tlawmngai pawl aiawh leh thuthar thehdarhtu engemawzat an tel a. Mithiamte thuziak ngaihthlak a, sawihona hun tha tak hmanzui nghal a ni.

Inkhawm hi Pu T.Saikunga, District & Sessions Judge, Aizawl-cum-Member Secretary, Aizawl District Legal Services Authority in a kaihruai a. Khuallian Pu R.Lalrinawma chuan khawvel pumin do ngai nia a hriat, a do mek te chu Mizoramah pawh ram kilkhawr tak ni mahila thliarkar rilru pu lova kan do ve te leh chung atana kan lo inbuatsaih ve te chu kan tih tur pawimawh tak a ni, a ti. Mizoram sorkarin Dan leh Hrai kenkawh a ngaih pawimawh zia tarlangin Manifesto-ah pawh 3-na hial a hlawh phah a. Tunah hian Mizoram sorkar chuan Judicial Service-ah mi 13, Senior Civil Judge 6 leh District Judge 3 a la thar tawh a ni, a ti a. Separation of Judiciary chak taka kalpui a nih laiin sorkar chuan Judiciary tana thil pawimawh hna thar lak belh leh ruhrel ruangam din kawngah theihtawp chhuahin Dan rorelnaah erawh a inrawlh ngai lo, a ti. Law Commission pawh chak taka kalpui niin Insurance chungchanga harsatna lian tak mipui vantlangin an tawh mekte chu chinfel mek a ni a. Zaithiam leh film siam tute hmakhaw ngaiin copyright chungchangah thui tak hmalak a ni tawh a, Police Department-ah phei chuan a Cell hran din a ni tawh nghe nghe, a ti.

Hna rim tak thawk tura naupang leh hmeichhiate chhawrh luih khapna Dan chu rampumah kenkawh mek a ni a, hemi chungchang mipuite hnena hrilhhre tur te, thubuai hlabuai nei te tana tanpuitu hnathawk mek Legal Services Authority te hnathawh dan tarlangin mipui mimir te chuan harsatna an neih apiangin hengte hi rawn theih an ni Khuallian chuan a ti a. Rawtna neihte tan pawh Law Commission-ah thlen theih reng a ni a ti bawk.

Vawiin World day Against Child Labour hmannaah hian thuziak 2 chhiar chhuah a ni a, chungte chu - Dr. HTC Lalrinchhana ziak naupangte dikna chanvo chungchang leh Gracy L. Bawitlung ziak naupangte hrem chungchanga Dan dinglai te a ni a. Sawihona hun hman zui a ni.

Mithiamte hmuh danin tun dinhmunah khawvel pumpuiah hian naupang leh hmeichhia mi maktaduai 115 zet hnarim tak thawka chhawrh luih an ni a. India ram chu hemi kawnga hluar tak, mi maktaduai 20 zet chhawrh luih mek awma ngaih a ni. Kum 2012 hi ILO chuan hna rim tak atanga naupang te chhanchhuah kumah puangin kum 2016-ah chuan khawvel pumah he phurrit hi senghawi vek a tum dawn a ni.