Vawiin khan Aizawl Civil Hospital Conference Hall-ah zunthlum natna dona ni ‘World Diabetes Day’ hman a ni a. National Porgramme for Prevention & Control of Cancer, Diabetes, Cardio-Vascular Diseases & Stroke (NPCCDS) leh Mizoram Diabetic Society (MDS) tangkawp buatsaih a ni a. H&FW Principal Director Dr. F. Lallianhlira chu khuallian a ni. Thupui chu ‘The Family & Diabetes’ tih a ni.  

Khuallian chuan thu sawiin zunthlum natna hi ngun taka enkawl a ngai a, ei leh in lamah fumkhur a tul a, zuk leh hmuama insum leh taksa sawizawi that a pawimawh hle a ni, a ti a. Kan nundan (lifestyle) dik loh vanga hluar a ni, a ti a. Tunkum thupui chu ‘The Family & Diabetes’ a ni a, zunthlum natna veite hi an chhungten an enkawl a ngai nasa a, damlo aiin chhungte an buai thin hle a ni tiin kum upat hnuah chuan hriatrengna a tha lo telh telh a, damdawi ei chungchangah leh inenkawlna kawngah chhungte pawimawhna a zual zel a ni, a ti a. Hei vang hian zunthlum natna chungchangah pawh damlo leh an chhungte tan inhrilhhriatna kan uar chhoh zel a ngai a ni, a ti a. Zunthlum natna hi rilru hah nen hian a inhmeh lo em em bawk a, rilru hrisel leh hahdam pu hram hram chunga thlan titlak tam a tul hle a ni, a ti.

World Diabetes Day hi kum 1991 atang khan hman tan a ni a, Mizoramah chuan kum 2014 atang khan hman tan a ni. Tun dinhmunah hian khawvel pumpuiah mi maktaduai 425 vel zunthlum natna vei mek anga chhut a ni a. Kum 2014 atanga 2018 chhunga Mizoram district hrang hranga NPCDCS centre-a damlo inentir mi 3,58,725 zinga 41,778-te chu zunthlum natna vei an ni a. Hei hi 11.6% a ni.   

MDS Vice President Dr.Zohmangaiha, IRS (Retd) chuan programme hi a kaihruai a. NPCDCS State Nodal Officer Dr. Eric Zomawia chuan ‘The Family & Diabetes’ chungchangah sawizauna a nei a. MIMER Medicine Dept. Asst. Professor Dr. P.C. Lalramenga chuan zunthlum natna lanchhuah dan te, finfiahna te, zunthlum kaihhnawih natna te a tarlang a. MDS Secretary Er. Lalthakima chuan lawmthu sawina in hun a khar a ni. H&FW hotute leh hnathawkte, Mizoram Diabetic Society mi leh sate, Health Worker Training School, Kulikawn zirtirtu leh naupangte an tel a ni.