Vawiin khan Lawngtlaia Lorrain Hall-ah Nehru Yuva Kendra (NYK) Lawngtlai District huaihawtin NYK Foundation Day lawmna leh 2nd District Level Declamation Contest buatsaih a ni.

He hun hi Downtown English School-a zirtirtu Pi Laldinpuii Bawitlung chuan a kaihruai a. Lawngtlai DIPRO Pu C. Lalhruaitluanga MIS chu khuallian niin, NYK-in thalaite tana hma a lakna leh ram hma sawnna kawnga thalaite pawimawhna a sawi a. Thupui insawisiak chuan thalaite tan an ngaihdan puan chhuah theihna kawng a hawnsak bakah, an thiamna chher hriam thei turin a tanpui bawk a, inelna tha leh zawngchhang chi tak a ni, a ti.

Vawiin hi NYK Foundation Day a ni a. Hemi lawmna ni pah fawm hian Lawngtlai District chhunga thalaite tan thupui insawisiakna (declamation contest) hi buatsaih a ni a. Lawngtlai khawpui chhunga zirlai leh thalai mi panga telin, "Patriotism & Nation Building" tih thupui hmang hian sap tawngin thu an insawisiak a. Judge pathum awmin, judge zing atangin Pu Joseph Lalhmingthanga Chinzah, Account Officer, LADC chuan thu a sawi bawk.

2nd Lawngtlai District Level Declamation Contest-ah hian K. Lalhriatchhungi, Lawngtlai Chandmary, Vista English School zirlai chu pakhatna niin, Rs 5000/- leh citation a dawng a. Benjamin Vanlalpeka Chinzah, Lawngtlai Vengpui chu pahnihna niin, Rs 2000/- leh citation a dawng a. Nancy Zorinpuii, Lawngtlai College Veng, Vista English School zirlai chu pathumna niin, Rs 1000/- leh citation a dawng bawk.

He district level contest-a pakhatna hian state level-ah District ai a awh dawn a ni.