Vawiin khan Environment & Forests Minister Pu Lalrinmawia Ralte hovin Assembly Annexe Conference Hall-ah World Environment Day 2014 hman a ni.

Pu Lalrinmawia Ralte chuan Environment leh Forest hi Environment & Forests Department ta bik ni lovin Zofate ta a ni a, neitu thinlung pu a kan venhim a tul, a ti. Chhehvel boruak, min hualtu thing leh mau, nungcha tinrengte hi mihringte nena chengho tur leh in mamawh tawn tlata siam kan ni a, nasa taka kan suasam a kan tih piansual hunah chuan kan taksa leh thlarau nun thlengin a nghawng ang, a ti a. Sum leh pai leh hlawkna tun maia tel kan duh avanga ramngaw, ramsa leh rannung kan tihchereu a kan tihhlum thin hi insum a tul a, nakina thangthar lo la awmzel tur te chenna khawvel a chhiat vek loh nan venghima, siamtha tur kan ni, a ti. Leilungin hnawng a pawm theihna vawikhat tihchhiat a nih tawh chuan siam that leh a har a, chuvangin tuihna kang chat tur vennan chhehvel ngaw humhalh a pawimawh takzet a ni tiin Minister chuan vei na tak tak nen kan humhalh chuan harsatna lutuk awm lovin thing leh mau, ramngaw, ramsa leh rannung tinreng te hi kan la venhim theih ka beisei tlat a ni, a ti bawk.

Inkhawm kaihruaitu Principal Chief Conservator of Forests Pu Lalram Thanga IFS chuan he ni hman dan tobul sawiin mihringte dam khawchhuah nana thil pawimawh ber pakhat a nih dan leh khawvel hmun dangah pawh harsatna lian tham a nih tawh thu ziaka kan chhiar leh hriat thinte chuan Mizoram ngei pawh a luhchilh ve tak dan a hrilhfiah a ni.

Thusawitu dang MZU Zoology Department mithiam Dr . Zothansiama pawhin a lem nena lantirin sik leh sa mumal theih tak loh dan leh a chhante, chumi in mihring leh nungcha, thil nung tinreng tana nghawng a neih dante a tarlang a ni.

Vawiin inkhawmah hian World Environment Day puala Drama inziaksiak buatsaih lawmman dawngtute hnenah khuallian in certificate leh tangkafai a hlan hlawm a ni. Lawmman dawngtute chu - pakhatna Lalchuangliana, Electric Veng a ni a, certificate leh tangkafai Rs. 12,000 a dawng a; lawmman pahnihna certificate leh Rs. 10,000 dawngtu chu Zomuanpuia Vanchhawng, Tuikual North a ni a; lawmman pathumna TC Vanlalzauva, Hunthar Veng in Rs. 8,000 leh certificate a dawng bawk. Consolation prize dawngtu mi 10 te’n sumfai Rs.2,000 theuh an dawng a ni.

World Environment Day hi United Nations General Assembly, kum 1972 Stockholm-a an neih tum khan khawvel huapa hman tan an rawt chhuak a, kum 1973 atangin kum tin June ni 5-ah he Day hi hman thin a ni. Thil dangdai tak pakhat chu he ni hi Northern Hemisphere a cheng ten thal laiin an hmang a, Southern Hemisphere in fur ruahtui tlak tam lai taka an hman laiin Tropical Region a mi te chuan nipui vanglaiin an hmang ve tlat thung a ni.