772/2022-2023
Aizawl 3rd June 2022: Vawiin khan Mizoram Pollution Control Board (MPCB) leh District Education Office-te huaihawtin Mizoram District hrang hrangah 'World Environment Day 2022' pualin Rally neih a ni a. He Rally-ah hian School Eco Club-a zirlaite leh an zirtirtute bâkah MPCB leh DEO Office staff-te an tel a ni.

World Environment Day hi June ni 5 a ni a, kuminah hian Pathianni a nih avângin Zirtâwpni zingkârah hian hman a ni a, kumin thupui hi ‘Only One Earth’ niin plastic leh sarâng vawikhat hmana kan paih mai thin Single Use Plastic that lohzia leh kan leilung a tihchhiat nasatziate inzirtir nan hman a ni a, he Rally-a kal khâwmte hian Single Use Plastic hmang tawh lo turin thu an tiam (Pledge Taking) a, Single Use Plastic Free School ni thei theuh turin an inchah bawk.

He hunah hian Dr. Lalramnghaki Pachuau, Scientist B & ENVIS Co-ordinator, MPCB in thu a sawi a. Polythene leh Plastic Bag kan hman nasat avanga kan leilung chenna khawvel a tih tawp leh tihchhiat nasat zia te, heng plastic leh sarang tel lo hian kan awm thei a, hnualsuat a hun tawh tak zet tih te a sawi a ni. Vawiina rally chu mipuite hnenah plastic leh sarang a that loh zia zirtirna a nih thu te a sawi a, hengte hi hman loh theih loh a nih pawhin 100 Macron aia pan hi chu hmang lo hram turin mipuite leh kalkhawmte chu a ngen nghal a ni.

District khawpui chhunga awm ve lo sikul thenkhatin anmahni remchânna hmunah Rally hi an lo buatsaih bawk a, zirlaite chauh ni loin khawtlângin Single Use Plastic that lohzia an hriat theih nân thu ziakte kengin an au rual a, hmang tawh lo turin an intiam bawk.

World Environment Day 2022 lawmna pui ber Aizawl-ah chuan Chanmari leh Sikulpuikawn atangin School hrang hrang 22 zirlai kalkhawm 500 velin kawng an zawh a, Vanapa Hall kawtah intawkkhawmin he hunah hian thu an tiam a ni.