751/2025-2026

Aizawl, 5th June, 2025 : Vawiin hi khawvel pum huapa United Nations in a kalpui ṭhin "World Environment Day" a ni a, he ni denchhen hian PHE Department leh Central YMA ṭangkawpin Tuikual lui an thianfai a ni.

PMU, PHE Department office, MINECO tual zawlah hnatlang khuh hawnna hun hman  niin, Er. Zodinthari,  E-in-C, PHED chuan Khuallian niin telpui a ni.

Er Lalropuia Director, Project Management Unit, PHED chuan inkhawm hi a kaihruai a, Er Lalrinzuala Secretary, PHED & CYMA Co-ordination Committee leh Pu Lalhmachhuana, CYMA President te atangin thusawi ngaihthlak niin plastic sawngbawl that loh hi kan chhehvel atan a pawizia leh hman tlem a pawimawhzia kalkhawmte hnenah an chah a. Er Ngentluanga, Chief Engineer Zone 1, PHE Department kaihhruaina hnuaiah thutiam(pledge) sawi rualna hun hman tel a ni bawk. 

Khuallian chuan CYMA leh PHE Department kan thawk ho thei chu lawmawm a tih thu sawi in, Faina leh thianghlimna kawnga Mizoram in hma kan sawn zel theih nan, YMA leh PHE Department chuan thawhhona tha kan neih zel a pawimawh thu a sawi. Khuallian hian hnatlang turte vai liam in, tuikual lui leh a chhevel tih fai hnatlang neih chhunzawm nghal a ni. 

Vawiin hnatlangah hian YMA atangin Branch pasarih- Tuikual North Branch YMA, Tuikual South Branch YMA,  Dinthar Branch YMA, Chawnpui Branch YMA, Ainawn Branch YMA, New Capital Branch YMA leh Maubawk Branch YMA te atangin hnatlang an chhuak a, Zira PC - SBM(G) ambassador chuan hnatlan pui bawk in, PHE Department staff te nen an vaiin mi 200 chuang an hnatlang a ni.

United Nations General Assembly chuan kum 1972 khan June ni 5 hi World Environment Day atan a lo puang tawh a, a kum leh 1973 atang khan thupui thlan bik neiin hman tan nghal niin, Tun kum ah hian “Ending Plastic Pollution Globally” tih chu thupui atan thlan a ni.