750/2025-2026

Aizawl, 5th June, 2025 : Vawiin khan  Mizoram chhung hmun hrang hrangah World Environment Day hman a ni a, District tinah Samagra Shiksha District Project Office te bul tumin he ni hi hman a ni bawk.

World Environment Day-ah hian India ram pumah thingphun campaign neih a ni a, he programme hming atan hian ‘Ek Ped Maa Ke Naam 2.0' (Nute puala thingphun) tih chu hman a ni. Vawiin World Environment Day thupui atan hian "Plastic bawlhhlawh tihtawp" tih chu hman a ni a, District hrang hrangah hian School naupangte nen he ni puala punkhawm hi buatsaih a ni. Nute puala thingphun campaign hi June 6 atanga September 30,2025 chhungin India ram pumah kalpui a ni dawn a, Forest Department-te nen tangrualin School tinten thing tiak 70 theuh phun tur a ni a, India ram pumah thing tiak Vaibelchhe 10 phun tum a ni. School-ah te hian  Eco Club for Mission Life din a ni a, a la din lo pawhin din tura hmalak chhoh mek a ni. Eco Club te hian an school compound emaw hmun dang  remchangah emaw thing tiak an phun zui dawn a ni. 

Ek Ped Maa Ke Naam 2.0 Nute puala thingphun hian mihring nun enkawlna kawnga nute chawimawina leh hriselna kawnga an thawhhlawkzia a entir a, thingkung hi nunna chhawmdawltu a ni a, nute ang bawka thlah lo awm zel tur tana eizawnna, humhimna leh dam khawchhuahna petu a nihzia te inzirtir a ni. 

Vawiin khan Samagra Shiksha Aizawl District Project Office leh Aizawl District Level Plantation Committee tangkawp buatsaihin World Environment Day hi hman a ni a, Addl. Deputy Commissioner Pu Zoramsiama Hmar kaihhruaiin zirtirtute leh naupangte Govt Central Higher Secondary School-ah hun hman a ni a, thing tiak phun bakah plastic bawlhhlawh thatlohna te leh thingkung pawimawhna te inhrilh thar nan hman a ni. 

District dangah pawh World Environment day hi hman a ni a, District Project Office Samagra Shiksha buatsaihin zirlaite leh zirtirtu  te nen hun hman a ni a, thing phun pawimawhzia te sawiin thing an phun nghal bawk.