DIRECTORATE OF INFORMATION & PUBLIC RELATIONS, Government of Mizoram, India

749/2025-2026

Lunglei, 2025 Nikir thla ni 5: Vawiin khan Mizoram sawrkara Health & Family Welfare Minister Pi Lalrinpuii chuan K. Liantawna Hall, Kawmzawl, Pukpuiah Higher and Technical Institute Mizoram (HATIM) 16th Valedictory Ceremony chu khuallian niin a hmanpui.

Khuallian Pi Lalrinpuii chuan college zir chhuak mai tur zirlaite, zirtirtute leh nu leh pate lawmpuina hlanin, Baptist Church of Mizoram (BCM)-in a din chhan ang taka HATIM-in zirlai ṭha, rin tlak, thawk rim leh hlawhtling an chher chhuak ṭhin chu lawmawm a tih thu a sawi a. Zirlai chhuak turte chu rinawmna leh mi dang hriat thiamna nunpui tlat tur te, thil chik tur leh dam chhunga inzir belh zel tur te, an tui zawng tak tih leh thawh tum tur te, mahni inrin tawkna leh huaisenna nena nun hmachhawn zel tur te'n a chah a. Mizoram chu ruihhlo leh HIV/AIDS-in a run mek tih tar langin, ruihhlo leh mipat hmeichhiatna kawnga inthiar fihlim tur leh a dona kawnga theih tawp chhuah turin zirlaite leh pung khawmte chu a chah bawk a ni.

H&FW Minister Pi Lalrinpuii chuan thingtlang kilkhawr zawka chengte leh mi harsa zawkte'n zirna ṭha an dawn theih nan sawrkarin theih tawp a chhuah thu leh Ministry of Social Justice and Empowerment (MoSJE) aṭangin HATIM tana hmeichhe hostel sakna tur sum hmuh a nih thu sawiin, hostel ṭha tak an neih thuai a, mi tam zawkin an chhawr ṭangkai ngei a beisei thu a sawi a. Sawrkar aṭanga tar leh vohbik pension late, chhungte thihna kara an ruang phurh man dawngte leh mipui healthcare - Mizoram Universal Healthcare Scheme (MUHCS) hnuaia damdawi ina inenkawlna man peksakte hlim hmel hmuh chu ram tana nasa lehzuala ke pen tura nawr kaltu leh chakna petu a nih thu tar langin, mipui pung khawmte chu mahni zawnah ṭheuh ram leh hnam tana malsawmna leh danglamna thlentu nih tum turin a chah a ni.

HATIM Valedictory Ceremony 2025 hi Lunglei South bialtu Member of Legislative Assembly (MLA) Pu Lalramliana Papuia bakah, Lunglei Municipal Council (LMC) Chairman Pu Lalzuithanga leh LMC councillor-te pawhin an hmanpui a. HATIM Principal Dr R. Lalnunthara'n hun kaihruaiin, BCM Associate General Secretary (Service) Rev. Vanlalmuankima'n hunserh a hmang a. Principal leh head of department-te'n zirlai chhuak turte hmelhriattirna leh lawmpuina thuziak hlanna hun hmangin, zirlai chhuak turte'n intiamna leh ṭawngṭaina hun an hmang bawk a. Valedictorian, Naomi Lalruatdiki (VI Semester, BSW) hnen aṭangin inthlahna thu sawi ngaihthlak niin, BCM Education Department Director Rev. RC Lalthanzama'n HATIM annual magazine, 'Dokimos' chu a tlangzarh a. HATIM Vice Principal Pi Hannah Lalnunpuii Khiangte chuan lawm thu sawiin, BCM Mission Department Director Rev. Joseph Vanlalruata'n malsawmnain hun a khar a ni.

HATIM Valedictory Ceremony 2025-ah hian HATIM Assistant Professor Pu H. Lalruatkima kaihhruaiin zirlai ṭhate hnenah chawimawina hlan a ni a. Zirlai ṭha ber lawmman, HATIM Award 2025 chu Lalngaihsaki Hauhulh (Department of English)-in a dawng a. Department pariata zirlai ti ṭha ber (topper)-te hnenah heti ang hian proficiency award hlan a ni bawk:

(1) Department of Commerce: R. Lalngaihawmi

(2) Department of Computer Science: Joshua Vanlalhnehpuia

(3) Department of Social Work: B. Malsawmtluangi

(4) Department of English: H. Lalrinliani

(5) Department of History: Lalṭanpuii Renthlei

(6) Department of Philosophy: Lalfakzuala Zadeng

(7) Department of Education: Lalnunpuii

(8) Department of Psychology: Philip Vanlalchunglura

HATIM hi BCM kohhran hnuaiah June ni 21, 2007 khan din niin, course chi li - Bachelor of Commerce (B.Com), Bachelor of Computer Applications (BCA), Bachelor of Social Work (BSW) leh Bachelor of Arts (BA) te a awm a. Department hrang hrang pariat awmin, kumina zir chhuak tur vawiina thlah takte hi zirlai 82 an ni.

Attachment