Vawiin khan Chhimveng YMA Hall, Mamit ah World Environtment Day, 2017 chu School Education Department Mamit District leh Environment Forest & Climate change Mamit Division  bultumin  hman a ni a, Pu H. Lianzela, Addl D.C chuan khuallian niin a hmanpui. 

Vawiin World  Environment Day hmanpuitu Pu H. Lianzela chuan kan ram chu thangthar zelte tana chenna tlaka siam tur chuan thing leh mau kan humhalh a pawimawh zia sawiin, a kum telin kan chenna khawvel hian lum lam a pan mek zel a, tun hun chauh thlir lova hmakhaw thui tak thlir chunga thing leh mau humhalh nachang hre deuh deuh turin kalkhawm mipuite a sawm a ni. 

Pu Lalnunsanga, Khawlhring DFO Mamit chuan environment humhalh a tulzia sawifiahna a lem nen a nei bawk. 

World Environment Day 2017  pual hian   Environment lam hawi Drawing Competition buatsaih a ni a, Competition hi category hniha then niin category khatna ah hian Higher Secondary School leh High School awmin Category hnihna hi Middle School Section tan buatsaih niin, lawmman te hi khuallian hian a sem nghal a ni. 

He hun hi Pi Lalnunthari DEO, Mamit chuan kaihruaia,  Pu Micky R Lalenkawla DPC SSA Mamit pawhin thusawina a nei bawk. 

World Environment Day 2017 hmanna ah hian Mamit khawpui chhunga school hrang hranga zirlai thahnem tak an tel a ni.