Vawiin World Food Day 2016 Agriculture Conference Hall a hman chu Agriculture Minister Pu R Lalzirliana’n a hmanpui.

Khawvel ram hrang hrangin Riltamna tihrehna kawnga hmala tura intiamthar ni an hman helaiah pawh hmang theia an awm chu lawmawm a tih thu khuallian Pu R Lalzirliana chuan a sawi a. Khawvel hmun dang dangah he ni hman dan hi a in anglo va, hmun thenkhat ah chuan mipui te hnena an hriatthiam tur zawnga an thil tum puangzarin Public Awareness Campaign te neiin Hunger Walks, Food Drives leh World Food Day Dinner te buatsaihin hun hmang an awm thin thu sawiin US leh Canada ramah phei chuan pawl 60 chuang intelkhawm in University leh Company hrang hrang ten ‘Riltam awm lohna khawvel’ ( Zero Hunger World ) siam tum in nasa taka hma an lak dan a sawi bawk.

Mihring te hi Ei leh In tel lovin a nun theih lohva, tute mahin retheihna leh riltamna hi tuar lo se duhthusam a ni a, khawvel mihring awm pakua zela pakhat hi ei tur tlachham ni a chhut a niin kum tinin naupang tam tak chu eitur tha hmuh loh avangin an thih thin thu Agriculture Minister chuan sawiin riltamna hi tihreh theih, tih ziaawm theih a ni a, Khawvel ram hruaitu kalkhawm ten kum 2000 atanga tan an lak nasat avanga kum 15 a ral meuh chuan ei tur tlakchham avanga nitina thi mai tur mi 17,000 chhanchhuah an nih dan leh an damkhawchhuah phah dan te a sawi a. Eitur tlakchhamna hian khawvel a tihlim lo va, kan Environment pawhin a chhiat phah a, chuvang chuan a ven theih dan anga hma lak a ngaiin khawvel sik leh sa, boruak lo danglam avanga lo neih dan leh buh leh bal deuh chhuah dan te pawh thlakthleng a ngai a, khawvel mihring lo pung zel leh mipui ei tur dehchhuah dan tha leh tlo ngaihtuah a ngai tak zet tawh a, Climate Change mila inher rem zel a ngai takzet tawh, chuvang chuan helama kaihruaitu leh mithiamte thu sawi pawh awihin ngaihthlak sak a pawimawh thu a sawi.

‘Climate is Changing, Food and Agriculture Must too’ Vawin thupui a nih angin leilung hausakna te, Leilung hanna leh Tui hman dan, Ran zun leh ek hmang tangkai tura sawngbawl dan te chhiatna thleng thut thei laka inven dan tur leh ranvulh te an lo hrisel zel dan tur te zirho leh hriat mai bakah a taka nunpui a ngai takzet tawh a ni Minister chuan a ti a. Khawvel ram dang mithiamte umpha in an an ngaihtuahna te leh an thiamna te chu hmang tangkai lehzual turin kalkhawmte chu a ngen a ni.

Vawiina Observance of World Food Day 2016 hmanna hi Pu Lalrammawia, Additional Secretary, Agriculture Department in a kaihhruai a, Theme Presentation Dr. H. Saithantluanga (MAS) an hmangin thupui ‘Climate is Changing, Food and Agriculture must too’ tih chu sawifiah in hmalakna zel tur atana tha tur te a sawi a. Pu Rohmingthanga Colney ( MAS ) Deputy Director Planning & Monitoring in duanlawk anga tluang taka programme hman a nihna ah lawmthu sawiin hun a khar a ni.