Vawiin chawhnu khan Chief Minister Pu Lal Thanhawla hovin Integrated Child Development Services (ICSD) Scheme hnuaia State Mission Steering Group (SMSG) chu Chief Minister’s Office Conference Hall-ah an thukhawm a. Meeting ah hian Social Welfare Department enkawltu Minister Pu P.C. Lalthanliana leh Parliamentary Secretary Pu K. Lalrinthanga te bakah SMSG a Member te an tel a ni.

Chief Minister Pu Lal Thanhawla chuan Mizorama ICDS kalpui dan chu hmun dang ngaihtuah chuan a ti tha pawl tak nia a hriat thu sawiin nausen leh naupai te an ngaihven avangin IMR te pawh a tlakhniam phah a ni a ti a. Mahse tun dinhmun hi duhtawk mai lova a ti tha ber ni turin tan tlan a ngaih thu a sawi bawk. Pu P.C. Lalthanliana chuan ICDS thuamchakna leh her remna ‘Posts sanctioned under Strengthening and Restructuring’ atan chak taka hma lak mek a nih thu sawiin, hemi atan a thawhkhatna atan post thar siamna 52 chu chak taka kalpui mek a ni, a ti.

Meeting ah hian Mizorama ICDS dinhmun te, a thawktute dinhmun te, post awm dan te, Strengthening and Restructuring hnuaia post siambelh tur te, District lamah inbun dan tur te chu Social Welfare Department Director Pi Vanlaldini leh Deputy Director Pi Laldikkimi ten chipchiar takin an tarlang a. Meeting ah hian ICDS hnuaia thawk pension la fel lo chungchangte leh Anganwadi Worker leh Anganwadi Helper te thla tin lawmman tihsan pawh sawiho a ni.

Sawrkar Laipui chuan nausen, nu naupai, nu nausen enkawl mek leh kum 6 hnuai lam naupangte enkawlna hi a ngai pawimawh a, hemi atan hian ICDS kalpui mek dan chu her remin ICDS hi Mission Mode a kalpui turin Strengthening & Restructuring of ICDS hi Inter Ministerial Group leh Planning Commission ten kum 2013 khan an rawn rawt chhuah thar, chumi a an rawtna te ang chuan state tin te chu ICDS kalpui turah hriattir a ni a. State Mission Steering Group pawh hi he ruahmanna thar hnuaia din niin Chief Minister hi Chairman niin Secretary, SWD chu ICDS Mission Director mawhphurhna pek a ni. Chief Secretary kaihhruaina hnuaiah ICDS tan hian State Empowered Committee din a ni bawk a ni.

ICDS kalphung thar Strengthening & Restructuring of ICDS atan tunhnaiah khan Joint Director 1 leh District Programme Officer 4 post te chu hnawhkhah niin a thawhkhatna atan post 47 atan hma lak mek a ni a. District Cell awmsa pahnih bakah Dsitrict Cell 4 din thar a ni dawn a. A thawhhnihna leh a thawhthumna atan post 145 siam a ngai dawn bawk a ni. Heng hna tam zawk hi co-terminus tur a ni.

Kumin June thlaa Council of Ministers thukhawm chuan ICDS Scheme, Mission Mode a kalpuia hemi hnuaia a ruangam her rem (restructuring ) leh a thuam chak (strengthening) nan a, hna (post) 57 siam leh hnawhkhah rawtna hi an lo pawmpui tawh a ni.

ICDS hi Mizoramah kum 1978-1979 khan bul tan niin ICDS Block hmasa ber chu East Lungdar niin tunah chuan Block zawng zawng hi ICDS in a tuam tawh a, Anganwadi Centre 2,244 lai a awm mek a, hengah te hian naupang kum 6 hnuai lam 80,081 leh nu naupai mek leh nu nau enkawl mek (thla 6 hnuai lam) nu 20,477 ten ICDS hnuaia hamthatna te an dawng mek a ni.