Sorkar laipuia Ministry of Food Processing Industries (MoFPI) hmalakna 2 - World Food India 2017 leh Kissan SAMPADA Yojana - chungchanga inhrilhfiahna hun chu MoFPI, Mizoram sorkara Commerce & Industries leh Associated Chambers of Commerce & Industry of India (ASSOCHAM) tangkawpin vawiin khan Hotel Regency, Aizawl-ah heng scheme 2 te inhrilhhriatna hun hman a ni.
He hunah hian Commerce & Industries Department aihawhin Addl. Director, Pu C. Lalbiakthanga’n kalkhawm te hnenah lawmna thu a sawi a. Director, MoFPI Pu Jitendra Kumar chuan kumin May thlaa Prime Minister Pu Narendra Modi-in a tlangzarh tak, loneitute tihchangtlun nana sorkar laipuiin ruahmanna thar a siam ‘SAMPADA’ (Scheme For Agro-Marine Processing & Development of Agro-Processing Clusters) chungchang sawifiahin he Scheme bik atan cheng vaibelchhe 6000 bituk a ni a, rampumah loneitu nuai 20 chuangin an hlawkpui ngei beisei a ni a ti. Kumtin ramchhunga thlai leh thei tharchhuah hloh zat chu suma chhutin cheng vaibelchhe 92,000 (16% of annual harvest & post-harvest produce) a nih thin avangin sorkar laipui chuan SAMPADA hmang hian thlai/thei tharchhuah leh a sawngbawlna tur atan hmalakna thui tak neih a tum a, he Scheme thupuiah hian ‘Farm to Fork’ tih hman a nih angin thlai tharchhuah a nih atanga ei tura siampeih a nih thlengin he Scheme hnuaiah hian sorkar chuan tanpuina pek a inhuam dawn a ni tih a sawi bawk. Hei hian nasa takin food processing sector a tihchangtlun beisei a ni a, mi tam tak tan eizawnna kawng a siam a, loneitute sum dehchhuah a tihpun nasat bakah thlai/thei leh heng atanga ei tur siamchhuah man(rate) pawh a mumal theih zawk beiseiawm a ni a ti.
General Manager, NABARD Aizawl Pu Rakesh Srivastava pawhin thu sawiin SAMPADA hnuaiah hian NABARD kutah loan pekchhuah tur cheng vaibelchhe 2000 dah a ni a ti a. Mizoram-ah chuan he Scheme hmang hian state sorkar project bakah sorkarin a pawmpui mimal project te chu tanpuina pek theih a ni tih a tarlang bawk. Head NE Business Unit, Godrej AvgroVet Pu Debashish Nag chuan oil palm hmanga Mizoram sorkar nen an thawhhona tluang taka a kal zel thu sawiin Mamit leh Kolasib-ah oil palm chingtuten kum 3 kalta chhung khan cheng vaibelchhe 3 chuang oil palm rah an hralh tawh a ni, a ti.
Food processing sector tihchangtlun zawk nan sorkar laipui chuan ramchhunga thlai/thei dehchhuah leh heng atanga ei tur siamchhuahte khawvel zau zawka tihlar tumin November n 3-5, 2017 chhung khian Vigyan Bhawan, New Delhi-ah ‘World Food India Summit 2017’ a buatsaih dawn a. He Summit-ah hian khawvel ram hrang hrang atangin an tel bakah ramchhung state hrang hrang ten an thlai/thei dehchhuah leh thilsiamte pholanna an nei dawn a ni
