World Forestry Day hi khawvel pumah March ni 21-ah hman a ni thin a. He ni hi mipuite hnena ramngaw thing leh mau, hnim leh thlaite tangkaina leh humhalh a pawimawhzia inzirtirna atan hman a ni thin. World Forestry Day hi European Confederation of Agriculture General Assembly vawi 23-na, kum 1971-a hman anih khan a rawn irhchhuak tan a, chumi kum tawp lamah United Nations Food and Agriculture Organisation chuan a hun leh a ni ruat felin March ni 21, khawvela chhun leh zan hun inchen lai (chu chu southern hemispheres autumnal equinox leh northern hemisphere-a vernal equinox) hi khawvel ramtina chengten ramngaw hausakna humhalh pawimawhzia kan hriat thar lehna atana hman turin alo ti ta a ni.

He niah hian ramngaw hi kan lui tui chawmtu tuihnar kan hmuhna anih zia te, thing leh mau, hnim leh thlaite tona leh, ramsate tualchaina hmun anih zia te, mihringte tana nun hahdamna leh hlimna min thlentu anih zia te, khawvel finna zirna kawnga tanpuitu tangkai anih zia te, mau, ramhmul damdawi leh khawizu kan hmuhna anih zia te, kan hriselna leh damrei nana kan mamawh boruak thianghlim (oxygen) min petu anih zia te, sik leh sa vawngtu anih zia te, lei min tur vengtu anih zia te leh ramngaw leh leilung hausakna hi renchem leh daih zai taka hman a tulzia hriatchhuah nana in zirtina hun atan hman thin a ni.