Pu Lal Thanhawla chuan Mizorama zirna lo tlahniam zel siam that chu an thil tumte zinga pawimawh ber pakhat anih thu a sawi a. He hna thawk tura Commission an din, a member ni tura mithiam an sawm ten an sawmna an pawm chu lawmthu a hrilh a. A bik takin New Delhi lam atanga an mi sawm, zirna lama mi thiam chungchuang Prof. A.K Sharma hnenah lawmthu a sawi a. Chief Minister chuan kan zirlai naupangte hi zirna lamah khawvel inelnaa tel ve phak khawpa siam an duh thu a sawi a High school leh college te hi khawtinin kan duh a, a tam zawh poh leh zirna a chhia a ni a ti a. Zirtirtu khawpuia insawn tum ngar ngar hote avang hian an hnathawhna khua zirlai ten an tawrh thin avang leh sawrkar sum tam tak seng a matric result tha nei ngailo tam takte hian zirna an pawt hniam nia a hriat thu a sawi a. Heng a chhe lai siam tha tura Commission an din hian, zirna lama thiamna neite chauh nilo, kawng hrang hrang danga thiamna nei ten thurawn leh rawtna an neihte pe thin turin leh a member ngeite pawh kawm thin turin Chief Minister chuan hetiang mi te chu a sawm a. Commission memberte lakah rinna a nghah tlat thu sawilangin, anni pawhin thiamna bik neite chu kawm kual bawk thin turin a chah bawk a ni. An hnathawhna tur tul leh mamawh angte chu ngaihtuah sak zel an ni ang a ti bawk.

Home Minister Pu R.Lalzirliana pawhin introductory speech neiin Commission member ni tura an mi sawm ten an sawmna an pawm chu lawmthu a sawi bawk a ni.

Commission member ruatte hi Pi Esther Lalruatkimi’n hmelhriattirna a nei a. Commission memberte chu : 1. Prof. A.K.Sharma, Chairman, 2. Prof. G.L.Arora   3. Prof. Ved Sharma, 4. Prof.S.Hom Chaudhuri, Secretary, 5. Prof.A.N.Rai  6. Dr.L.N.Tluanga, 7.Dr.Lalrindiki Fanai, 8. Rev. Dr. Chuauthuama, 9. Rev.Dr. Thanzauva, 10. K.Riachho,IAS leh 11. Esther Lalruatkimi, IRS te an ni.
lrl