Vawiin khan World Forestry Day pualin Mizoram Environment & Forests Department chuan Bethlehem Vengthlanga Forest Training Institute-ah Consultative Meeting a buatsaih a, Chief Conservator of Forests (CCF) Pu Lalthangliana Murray, IFS chuan kaihruaiin Principal Chief Conservator of Forests (PCCF) & Principal Secretary Pu Lalram Thanga, IFS chu khuallian a ni.

Consultative Meeting-ah hian Pu Lalram Thanga chuan thuhma a sawi a, Er. H. Duhkima, SE, PHE buatsaih ‘Forests and Water’ tih leh Pu Tsewang Gyaltson, IFS, WHO buatsaih ‘Climate Change and Forest’ zirhona neih a nih zawh hnuah kalkhawmte nena sawihona hun tha tak neih a ni bawk.

Kum 1971-a 23rd General Assembly of the European Confederation of Agriculture chuan ramngaw humhalh pawimawhzia inzirtirnan khawvel pumah World Forestry Day hman nise tia a rawtna chu 1972 khan United Nations Food & Agriculture Organization (FAO) chuan a pawm a, kum tin March ni 21-a hman turin a rel ta a ni. Kumin bika thupui atan 'Forests and Water' tih thlan a ni a, Mizoramah pawh kum tinin he ni hi hman thin a ni.

He inrawnkhawmna programme ah hian ramngaw leh nungcha humhalh (conservation) lama tlawmngai pawl hrang hrang Environmental NGOs – Central YMA, Bio-diversity Conservation Network (BIOCONE), Association for Environment Preservation (ASEP), Mizo Academy of Science (MAS), Save Environment Association (SENVA), Mizoram Environment & Forest Consultative Forum (MEFCOF), Centre for Environment Protection (CEP)-te bakah hetiang lama tuimi leh thiamna bik nei leh official mi 100 chuang an tel a ni.