Guide kum za tlinna champha, World Guide Centenary chu vawiin khan Vanapa Hall-ah lawm a ni a. Chief Minister Pu Lal Thanhawla, President, Mizoram Bharat Scouts & Guides chu Khuallian a ni.

Chief Minister chuan Scouts and Guides te chu mi tlawmngai, thuawih thei, insum thei leh vantlang thil mahni ta anga enkawl thiam te an ni a, nu leh pa te, zirtirtute leh aia upa te thuawih kawngah hmahruaitu tura beisei an ni, a ti a.  Khawsak leh awmdan mawi lantir kawngah te, tlawmngaihna leh zuk leh hmuama insum theihna kawngah te Scouts leh Guides te chu midangte kawhhmuhtu ni turin a fuih. Pu Lal Thanhawla chuan Mizoram-a Scouts and Guides dintute chu zahawm leh entawn tlak a tih thu sawiin, tuna Scouts leh Guides tanglai mek te chu theihtawp chhuah a sualna chi hrang hrang  do let turin leh ram leh hnam hmasawnna tura thawk turin a chah bawk a ni.

Guide Centenary lawmna inkhawm hi Pi Laldinglianin a kaihhruai a. State Chief Commissioner Pu Zoliana Royte, Director Sports and Youth Services chuan Mizoram Bharat Scout & Guide chanchin tlangpui leh hmalakna hrang hrangte tarlangin thu a sawi a. Mizo Guide hmasa berte zinga mi pahnih, Pi Khawlkungi leh Pi Sairengpuii te hnenah chawi mawina hlan a ni a. Naupangte enkawlna chungchang a training na sang ber train chhuak mi 6 hnenah Himalayan Wood Badge hlan a ni bawk.

Mizoramah hian Scouts Movement hi June ni 6, 1932 khan Lungleiah Rev. F.J. Raper leh Rev. Carter-a te hova din a ni a. Girl Guides hi 1941 ah Aizawl a din a ni ve thung a. Guide hmasa ber 12 te zingah mi pathum Pi Ngurkhumi, Pi Khawlkungi leh Pi Sairengpuii te chu an la dam a ni. Mizoram-a Guide te zingah hian ram pum huap chawimawina sang tak tak dawng mi enge maw zat an awm tawh a. Guide chawimawina sang ber Silver Elephant chu Pi Denghmingthangin a dawng tawh a,  Silver Star dawng pha mi 6 an awm tawh bawk a ni. Tunah hian Rangers, Rovers, Scouts, Guides, Bulbul leh Cubs tiamin Mizoram Bharat Scouts & Guides member 6856  an awm mek a ni.