Vawiin April ni 7, 2016 hi World Health Day a nih angin Mizoramah pawh hman a ni a. Aizawl-ah chuan World Health Day puala inkhawm buatsaih hi Civil Hospital Auditorium-ah chawhma dar 11 khan neih a ni.

Dr. Eric Zomawia, State Nodal Officer, NCD chuan World Health Day 2016 thupui "Zunthlum lakah inveng la, inenkawl la, hneh rawh" tih hmangin Powerpoint Presentation a hrilhfiah a. Mihringin zunthlum kan lo neih dan te sawifiahin Zunthlum hi khawvel mipuite min suat tam em emtu natna a ni tawh a. Kum 1980-ah khan khawvel mipui maktaduai 108 in an vei ni a chhut a ni a. Hun a lo kal zel a, kum 2014-ah chuan maktaduai 422 laiin an vei tawh a, kumtin mihring maktaduai 1.8 (maktaduai khat point pariat) in an thih phah niin a sawi bawk. Dr. Eric-a chuan zunthlum hian taksa a khawih pawi em em a. Thluak, thisenzam, kal leh lung bakah taksa peng pawimawh lai a khawih chat chat avangin kan ngaihthah hauh lo tur a ni a ti a. Zunthlum vei lohna tura thil pawimawh te sawi nghalin ke a kal tam a, exercise lak that a, thei leh thlai hring ei tam a ngai a ni a ti a. A vei mek te pawh inthlahdul hauh lova control tura tanlak a pawimawh zia a sawi bawk.

He hun hi Dr. F. Lianhlira, Jt. Director (Planning) Directorate of Health Services in a kaihruai a. Dr. F.Lianhlira hian World Health Day hmangtu kalkhawmte lawmna thu sawiin zunthlum awmzia leh a vei lo tura tan kan lak a hun tak zet tawh thu a sawi a. Hun tawp hi Dr. Rosangluaia, Medical Superintendent, Civil Hospital in lawmthusawina in a khar a.

Vawiin World Health Day pual hian Civil Hospital Aizawl NDC Clinic-ah a thlawnin zunthlum leh BP Check neih a ni a, mi 200 bawr vel an inentir a ni.