Zanhnih riaka Mizoram lo tlawh Union Minister of State Rural Development Pu Sudarshan Bhagat chuan vawiin khan Kolasib leh Bilkhawthlir-a RD Development Ministry hnuaia hmalakna hrang hrang a tlawh. Union minister hi Parliamentary Secretary, Lt.Col ZS Zuala (Rtd) leh Pu Lalhmingthanga IAS Secretary Rural Development ten an tawiawm a. Minister hian Kolasib leh Bilkhawthlir a RD dept hmalakna hrang hrangte a tlawh hnuin, Diakkawn YMA Hall ah amah lawmna inkhawm buatsaih a ni.

Diakkawn YMA Hall-a Pu Sudarshan Bhagat lawmna inkhawm Pu H.Lalengmawia IAS, DC Kolasib kaihhruai ah hian Union Minister chuan, Central sorkar in thingtlang mipui te a ngaih pawimawh thu te, an hmasawnna tura sorkar hmalakna hrang hrang te chu a taka hmuhpui tur leh hmasawn zel tura kawng pawimawh te hriatpui tura a hmun ngeia lokal a nih thu a sawi a, Ram a changkan dawn chuan, khawpui (Urban) changkang ringawt hi a tawk lova, ramchhunga thingtlang khua leh mipui te pawh an changkan tel angai ani tiin, Central sorkar chuan thingtlang hmasawnna a ngaipawimawh ani a ti bawk. Parliamentary Secretary, Lt.Col ZS Zuala (Rtd) pawhin thu sawiin, Union Minister, buaitak hna ngah takin keini ram kilkhawra cheng te min tlawh hi State sorkar aiawhin lawmthu ka hrilh a, a hna chanpual a ngaih pawimawhzia a lantir ani a ti bawk.

Kolasib ah hian Pu H.Lalengmawia IAS, DC leh Officer dang ten lo hmuakin, Kolasib District chhunga RD Dept hmalakna hrang hrang te a hmun ngeia enpui tura a lokal chu lawmawm a tih thu a sawi.